වසර පහළොවකට පෙර කොටි සංවිධානය විසින් මිසයිල ප්‍රහාරයකින් යාපනයේ ඉරණතිව් මුහුදු සීමාවේ දී වනසා දැමූ ඇන්ටනෝව් 24 ගුවන් යානයේ සුන්බුන් අතර තිබී මිනිස් ඇට කැබලි, ඇඳුම්, සෙරප්පු වැනි දේ, ‍දොස්තර නළාවක්, ර‍ත්තරන් දතක කොටසක් ඇතුළු දේ සොයා ගත් බව පොලිස් මාධ්‍ය ප්‍රකාශක පොලිස් අධිකාරී බුද්ධික සිරිවර්ධන මහතා කියයි.

යානයේ කළු පෙට්ටිය මෙතෙක් සොයාගෙන නැත. යානය පිපිරවූ මුහුදු කොටින් එය රැගෙන යන්නට ඇතැයි සැකයක් ද පවතී.

පොලීසියට හා ත්‍රිවිධ හමුදාවට අමතරව සිවිල් ගුවන් සේවා, පුරා විද්‍යා, රස පරීක්ෂක, අධිකරණ හා අධිකරණ වෛද්‍ය නිලධාරී, නීතිපති නිලධාරී හා දෙස් විදෙස් මාධ්‍යවේදීහු එහි ගොස් සිටිති.

කිමිදුම්කරුවන් අඩි තිහක් මුහුදු පතුලේ දී හඳුනාගන්නා කොටස් දොඹකර සහිත නැවකින් උඩට ගැනේ.

නොකැළඹුණු මුහුදට හොඳට ඉර අව්ව පයා තිබියදී මුලින්ම මේ කොටස් දුටු ධීවරයන් ඒ බව නාවික හමුදාවට දන්වා ඇත.

කොටස් ගොඩ ගැනීමේ ආරම්භය එය බව දැනගන්නට තිබේ.

(යානය ගොඩ ගැනීමට පෙර මුහුද යටදී ගත් ඡායාරූප)