ඉරානයට එරෙහිව සිදු කිරීමට නියමිතව තිබූ "ප්‍රබල" ප්‍රහාර මාලාවක් අවලංගු කිරීමෙන් අනතුරුව, එරට සමඟ නව සාකච්ඡා සඳුදා ආරම්භ වන බව එක්සත් ජනපද ජනාධිපති ඩොනල්ඩ් ට්‍රම්ප් ප්‍රකාශ කළේය.

"ප්‍රහාරය සූදානම් වෙමින් පැවති ආකාරය ඔවුන් දුටු නිසා එහි ප්‍රබලත්වය ගැන ඔවුන් දැන සිටියා," යැයි ඉරිදා 'එයාර් ෆෝස් වන්' (Air Force One) ගුවන් යානයේ සිටි මාධ්‍යවේදීන් හමුවේ ඔහු පැවසීය. "අපි ඔවුන් සමඟ සාකච්ඡා මාර්ගයෙන් කටයුතු කරනවා. එය හෙට දහවල් ආරම්භ වෙනවා."

ගිවිසුමක මූලික කොන්දේසි හෝ රාමුව (perimeters) පිළිබඳව එකඟතාවකට පැමිණ තිබූ බැවින් කිසිදු ප්‍රහාරයක් එල්ල නොකර "මඳක් රැඳී සිටින" ලෙස ඉරානය සහ මැද පෙරදිග සිටින එක්සත් ජනපද මිත්‍ර පාර්ශ්වයන් තමාගෙන් ඉල්ලා සිටි බව ට්‍රම්ප් මීට පෙර 'ටෘත් සෝෂල්' (Truth Social) හි පළ කළ සටහනක සඳහන් කර තිබුණි.

ට්‍රම්ප්ගේ මෙම ප්‍රකාශයන්ට ඉරානය මෙතෙක් ප්‍රතිචාර දක්වා නොමැත. සාකච්ඡා මාර්ගයෙන් යුද්ධය අවසන් කිරීම ආසන්න බවට එක්සත් ජනපද ජනාධිපතිවරයා නැවත නැවතත් ප්‍රකාශ කළද, ඉන් අනතුරුවත් දෙපාර්ශ්වය අතර ප්‍රතිප්‍රහාර හුවමාරු වීම් සිදුව තිබේ.

'එයාර් ෆෝස් වන්' යානයේදී අදහස් දක්වමින් ට්‍රම්ප්, ටෙහෙරානය සමඟ ගිවිසුමකට එළැඹීම සඳහා නිශ්චිත කාලසීමාවක් ප්‍රකාශ කිරීම ප්‍රතික්ෂේප කළ අතර, "අපි බලමු තත්ත්වය කොහොමද කියලා. අපිට ඕනෑම වෙලාවක ක්‍රියාත්මක වෙන්න සූදානම්... මට  මිනිස්සුන්ව මරන්න වුවමනාවක් නැහැ," යනුවෙන්ද පැවසීය.

සති අන්තයේදී ප්‍රහාර එල්ල නොකරන ලෙස සෞදි අරාබියේ ඔටුන්න හිමි කුමරු මොහොමඩ් බින් සල්මාන් මෙන්ම එක්සත් අරාබි එමීර් රාජ්‍යය සහ කටාර් වැනි එක්සත් ජනපද හවුල්කරුවන් ද තමාගෙන් ඉල්ලා සිටි බව ට්‍රම්ප් වැඩිදුරටත් සඳහන් කළේය.

"අපි සියල්ල සූදානම් කරගෙනයි හිටියේ," ට්‍රම්ප් පැවසීය. "ඔවුන් එහෙම ඉල්ලන්න හේතුව තමයි ගිවිසුමක් ඇති වෙයි කියලා ඔවුන් හිතන එක. හෝර්මුස් (Hormuz) සම්බන්ධයෙන් ගිවිසුමක් තියෙනවා, න්‍යෂ්ටික කටයුතු සම්බන්ධයෙනුත් ගිවිසුමක් ඇති වේවි."

ට්‍රම්ප්ගේ මෙම නිවේදනයෙන් පසු ආසියානු වෙළඳ කටයුතු අතරතුර සඳුදා උදෑසන ගෝලීය බොර තෙල් මිල පහත වැටුණි. ඒ අනුව 'බ්‍රෙන්ට්' (Brent) බොර තෙල් මිල 4.5% කින් පහත වැටී ඩොලර් 83.98 (පවුම් 62.26) ක් වූ අතර, එක්සත් ජනපද වෙළඳපොළේ තෙල් මිල 4.6% කින් පහත වැටී ඩොලර් 80.74 (පවුම් 59.85) ක් විය.