(අංජුල මහික වීරරත්න)

ආබාධික පුද්ගලයන් සඳහා සහායක උපකරණ දේශීය නිෂ්පාදනය කිරීම සඳහා ව්‍යාපෘතියක් ක්‍රියාත්මක කිරීමට කැබිනට් අනුමැතිය ලැබී ඇත.

2025 අයවැය යටතේ සමාජ ආරක්ෂණය සහ ආබාධිත පුද්ගලයින් සඳහා සහාය උපකරණ දේශීයව නිෂ්පානය කිරීමේ පහසුකම් පුළුල් කිරීමට යෝජනා කරනු ලැබ ඇත. 

ඒ අනුව, රාගම රක්ත වේද පුනරුත්ථාපන රෝහල සහ ශ්‍රී ලංකා ජාතික රෝහල ආශ්‍රිතව ව්‍යාපෘතියක් ක්‍රියාත්මක කිරීම සඳහා රුපියල් මිලියන 500ක් වෙන් කර තිබේ. 

රාගම රක්ත වේද හා පුනරුත්ථාපන රෝහලේ ආබාධිත පුද්ගලයින් සඳහා ආධාරක උපකරණ සපයන සේවාවන් වැඩි දියුණු කිරීම සහ ශ්‍රී ලංකා ජාතික රෝහලේ හදියි අනතුරු හා විකලාංග සේවාව යටතේ ආබාධිත පුද්ගලයන් සඳහා සහායක උපකරණ දේශීයව නිපදවීමේ පහසුකම් වැඩි දියුණු කිරීම යන සංරචක මෙම ව්‍යාපෘතිය මඟින් ක්‍රියාත්මක කිරීමට සැලසුම් කර ඇත.

ඒ අනුව, එකී ව්‍යාපෘතිය 2025-2027 මධ්‍ය කාලීන අයවැය රාමුව තුළ රුපියල් මිලියන 630.2 ක ප්‍රතිපාදන යොදා ගනිමින් ක්‍රියාත්මක කිරීම පිණිස සෞඛ්‍ය සහ ජනමාධ්‍ය අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.