(සුජිත් හේවාජුලිගේ)

අපි වෙනුවෙන් අපි අරමුදල  නිවාස ආධාර පිරිනැමීමට 2020- 21 වර්ෂවලදී ප්‍රතිලාභීන් තෝරා ගැනීමේදී ක්‍රියාන්විත රාජකාරියන්හිදී මියගිය,  පූර්ණ ආබාධිත හෝ අර්ධ වශයෙන් ආබාධිත පාර්ශවවලට ප්‍රමුඛතාව ලැබී නොමැති බව එම අරමුදල සම්බන්ධයෙන් නිකුත් කෙරුණු විශේෂ විගණන වාර්තාවේ  දැක්වේ.

නිවාස  ආධාර ලබාදීමේදී වැඩි අවධානය යොමු කර ඇත්තේ සේවයේ නියුතු පුද්ගලයන් වෙත බව නිරීක්ෂණයවී යැයිද  එම වාර්තාව සඳහන් කරයි.

2010 වර්ෂයේ සිට 2022 වර්ෂය දක්වා වසර දහතුනක කාලයේදී ප්‍රතිලාභ හිමි ලැයිස්තු පරීක්ෂාවේදී  ප්‍රතිලාභ ලබාදී තිබුණු අවස්ථා 3080 ක් අතරින් සියයට 71 ක් එනම්  අවස්ථා 2195ක් ලබාදී තිබුණේ සේවයේ නියුතු කාණ්ඩ වෙත බව විගණන අංශ පවසයි.

ප්‍රතිලාභවලින්  සියයට 29ක්  එනම්  අවස්ථා 85ක් පමණක් ක්‍රියාන්විත  රාජකාරියේදී මියගිය හෝ ආබාධිත වූ රණවිරු කාණ්ඩවලට  වෙන්කර තිබූ බව පවසන  එම වාර්තාව 2020 වර්ෂයේ දී යුද හමුදා සාමාජිකයන් පනහක් සඳහා  අර්ධ නිවාස අාධාර පිරිනමා තිබුණත් ඉහළ ප්‍රමුඛතාව සහිත නිර්දේශිත පුද්ගලයන් 315ක් අතුරින් ඊට තෝරාගෙන තිබුණේ  පහක්  පමණක්  බව සඳහන් කරයි.

තවද ශ්‍රී ලංකා යුද හමුදාව 2021 වර්ෂයේ අර්ධ නිවාස ප්‍රතිලාභ ලබාදීමේදී ක්‍රියාන්විතවලදී  මියගිය හෝ ආබාධිත බවට පත්වූ රණවිරුවන් 187ක් අතුරින් 17 දෙනකුට පමණක් ප්‍රතිලාභ ලබාදී තිබියදී  දැනට සේවයේ නිරත  76ක් අතුරින් 67 දෙනෙකුටම  ප්‍රතිලාභ ලබාදී තිබූ බව  පෙනී ගොස් ඇතැයි විගණන  වාර්තාව සඳහන් කරයි.

අපි වෙනුවෙන් අපි අරමුදලේ කාර්ය සාධනය ඇගයීම පිළිබඳ  මෙම විශේෂ විගණන වාර්තාව පසුගියදා නිකුත් කෙරිණි.