(සජිවා කෝට්ටගොඩ සහ රවීන්ද්‍ර නෙත්තසිංහ)

දැදුරු ඔය ද්‍රෝණියේ  ඉහළ හා මධ්‍ය ප්‍රදේශවලට ඇද හැලෙමින් පවතින වර්ෂාපතන තත්වය හේතුවෙන් දැදුරු ඔය ජලාශයේ වාන් දොරටු 8 අඩි 11 බැගින් විවෘත කර ඉන් තත්පරයට ඝන අඩි 60600 ක ජලධාරිතාවක් දැදුරු ඔයට මුදා හැරෙන බව වාරියපොල  ප්‍රාදේශීය වාරිමාර්ග ඉංජිනේරු කාර්යාලය සඳහන් කරයි. 

දැදුරු ඔය ජලාශයෙන් දැදුරු ඔයට ජලය මුදා හැරීම නිසා  පහළ ප්‍රදේශවල  අධි ගංවතුර අවදානමක් පවතින බව වාරිමාර්ග දෙපාර්තමේන්තුව නිවේදනයක් නිකුත් කරමින් සඳහන් කර ඇත.

මේ හේතුවෙන්  වාරියපොළ, නිකවැරටිය, මහව,කොබෙයිගනේ, රස්නායකපුර ,බිංගිරිය, පල්ලම ,හලාවත, ආරච්චිකට්ටුව යන  ප්‍රාදේශීය  ලේකම් බල ප්‍රදේශවලට ආපදා තත්වය පිළිබදව  අනතුරු අඟවා තිබේ.

දැදුරු ඔය ජලාශයේ වාන් දොරටු විවෘත කිරීම නිසා  අනුරාධපුර පාදෙණිය මාර්ගය ඇල්ල පාලම ආසන්නයෙන් කිලෝමීටරයකට ආසන්න  ප්‍රමාණයක් අඩි අටකට ආසන්නව යටව ඇති අතර  එම මාර්ගයේ  ගමනාගමනයට  බාධා එල්ල වී ඇත.

අනුරාධපුර පාදෙණිය මාර්ගය ඊයේ (27)රාත්‍රී 12.00 සිට වසා දැමීමට කටයුතු කර තිබුණි. මාර්ගයේ ගමන් ගන්නා රථවාහන සඳහා කුරුණෑගල සිට පැමිණෙන රථ වාහන පාදෙණිය හන්දියේ  සිට නිකවැරටිය දක්වා ගමන් කර දළදාගම හන්දිය හරහා අනුරාධපුරය දෙසට යැවීමටත් අනුරාධපුර දෙස සිට  පැමිණෙන රථ වාහන දළදාගම හන්දියේ සිට නිකවැරටිය හරහා කුරුණෑගල දෙසට යැවීමටත් පොලිසිය  රථ වාහන සැලසුම් ක්‍රියාත්මක කර තිබේ. 

දැදුරු ඔය  ජලාශයේ වාන් දොරට විවෘත කිරීම නිසා   මහව ප්‍රාදේශීය ලේකම් කොට්ඨාසයට අයත් පවුල් 21 ක  පුද්ගලයින් 81 ක්  සඳහා සහන සැලසීම සඳහා සහන කදවුරක් ආරම්භ කිරීමට කටයුතු කළ බව මහව ප්‍රාදේශීය ලේකම් බී .එම්. නදුන් ආර්. සම්පත් මහතා පැවසීය.

ඡායාරූප -  එස්.බී.බණ්ඩාර