තමිල්නාඩුවේ සිට බෝට්ටු මඟින් නීතිවිරෝධී ලෙස  ඕස්ටේ‍්‍රලියාවට සංක‍්‍රමණය වීමට උත්සාහ කළ ශ්‍රී ලාංකික සරණාගතයින් ඇතුළු 1200 දෙනකු එම අනතුරුදායක බෝට්ටු ගමනේදී ජීවිතක්ෂයට පත් ඇතැයි දකුණු ඉන්දීය  ඕස්ටේ‍්‍රලියා කොන්සල් ජනරාල් ෂෝන් කෙලී මහතා ප‍්‍රකාශ කර ඇතැයි ඉන්දියාවේ ‘ ද හින්දු ’ පුවත්පත වාර්තා කරයි.

2008 සිට 2013 දක්වා කාලයේ මෙම පිරිස අනතුරුදායක මුහුදු ගමනේදී ජීවිතක්ෂයට පත්ව ඇති බවත්, මියගිය පිරිසගෙන් බහුතරයක් ලාංකික සරණාගතයින් බවත් දකුණු ඉන්දීය  ඕස්ටේ‍්‍රලියා කොන්සල් ජනරාල්වරයා සඳහන් කර ඇත.

නීතිවිරෝධි ලෙස බෝට්ටු මඟින් පැමිණෙන සරණාගත පුද්ගලයෙකුට කිසිදු අවස්ථාවක සරණාගත තත්ත්වය හිමි නොවන බව දැඩි ව කියා සිටින  ඕස්ටේ‍්‍රලියා කොන්සල් ජනරාල්වරයා වැඩිදුරටත් සඳහන් කර ඇත්තේ තමිල්නාඩුවේ සිටින ලාංකික සරණාගතයින්ට ඔස්ටේ‍්‍රලියාවේ සරණාගත තත්ත්වයට අයැදුම් කළ හැකිවන්නේ ඔවුන් නැවත සිය මව්රටට ගොස් , සරණාගතයින් පිළිබඳ එක්සත් ජාතීන්ගේ මහකොමසාරිස් කාර්යාලය හරහා පමණක් බවය.

මේ අතර තමිල්නාඩුවේ සිටින ලාංකික සරණාගතයින් පිරිසක් නීතිවිරෝධි ලෙස බෝට්ටු මඟින් නවසීලන්තයට රැගෙන ඒමට උත්සාහ දැරූ මිනිස් ජාවාරම්කරුවන් පිරිසක් අත්අඩංගුවට ගෙන ප‍්‍රශ්න කර ගෙන යන බවද දකුණු ඉන්දීය  ඕස්ටේ‍්‍රලිය කොන්සල් ජනරාල්වරයා සඳහන් කළ බව හින්දු පුවත්පත කියයි.