(සුජිත් හේවාජුලිගේ සහ  අංජුල මහික වීරරත්න)

පාර්ලිමේන්තුවේ ස්වාධීන පිරිසකට කැබිනට් මණ්ඩලය බාර දෙන්නැයි  කුරුණෑගල දිස්ත්‍රික් පාර්ලිමේන්තු මන්ත්‍රී නීතිඥ අනුර ප්‍රියදර්ශන යාපා මහතා  පාර්ලිමේන්තුවේදී අද (20) ඉල්ලීමක් කළේය.

ආණ්ඩුව වහාම ඉවත්වී අන්තර්වාර පාලනයකට  ඉඩකඩ  ලබාදිය යුතු බවද හෙතෙම සඳහන් කළේය.

මන්ත්‍රීවරයා මෙසේ පැවසුවේ සභාවේ කටයුතු ආරම්භයේදී විශේෂ ප්‍රකාශයක් කරමිනි.

මේ රාජපක්ෂවරුන්ගේ රටක් නොවන බවත් පවුල් පාලනයකට රට බාරදී  බුදිය නොගන්නැයි ඉල්ලා සිටින බවත් ඔහු කීවේය.

ආණ්ඩු පක්ෂය පැත්තට වඩා විපක්ෂය පැත්තේ  රට කළ හැකි හොඳ අය සිටින බවද  අනුර ප්‍රියදර්ශන යාපා මහතා පැවසීය.

මේ ආණ්ඩුව නිලධාරීන්ට වැරදි ආකාරයට වැඩ කිරීමටදී බලා සිටි බව සඳහන් කළ මන්ත්‍රීවරයා  සියලු ප්‍රශ්නය ඇතිවුණේ ඒ නිසා යැයිද සඳහන් කළේය.

හැංගිලා සිටිමින් මේ ප්‍රශ්නය විසඳිය නොහැකි බවත් ප්‍රශ්නය දුරදිග යෑම නිසා අද මන්ත්‍රීවරුන්ගේ ගෙවල්වලට ගල් ගහන තත්වයක් ඇතිවී තිබෙන බවත්  ඔහු ප්‍රකාශ කළේය.

ආණ්ඩුවට ඥානය පහළ වේවායි  යැයි  තමා ප්‍රාර්ථනා කරන බව යාපා මහතා වැඩිදුරටත් පැවසීය.