(අංජුල මහික වීරරත්න)

අයහපත් කාලගුණය නිසා අද උදෑසන විට විදුලි බිඳ වැටීම් 65,000කට අධික ප්‍රමාණයක් වාර්තා වී තිබෙන බව බලශක්ති අමාත්‍ය කුමාර ජයකොඩි මහතා පැවසීය.

එම විදුලි බිඳවැටීම් වලින් මේ වන විට 26,000කට ආසන්න ප්‍රමාණයක් යථා තත්ත්වයට පත් කර තිබෙන බවද අමාත්‍යවරයා සඳහන් කළේය.

හැම තැනකම වර්ෂාව බොහෝ ඉහලින් වාර්තා වෙන අතර සියලුම බලාගාර ආශ්‍රිත ජලාශ බහුතරයක් වාන් දමමින් පවතින බව අමාත්‍යවරයා සඳහන් කළේය.

කෙසේ වෙතත් විදුලි බිඳ වැටීම් යථා තත්ත්වයට පත් කිරීමටත් කාලගුණ තත්ත්වය බලපෑම් එල්ල කරමින් තිබෙන බව කී අමාත්‍යවරයා දැඩි සුලඟ සහ වර්ෂාව නිසා ගස් ඉවත් කර ගැනීමට අවශ්‍ය කටයුතු යම් මට්ටමකට ප්‍රමාද වෙමින් පැවතියත් උපරිම සේවාව ජනතාව වෙත ලබාදීමට කටයුතු කරමින් පවතින බව කීය.