ස්වයං රැකියා නියුක්තිකයන්ගේ සම්මේලනයේ සාමාජිකයන්ගෙන් සාමාජික මුදල් අය කිරීම නවත්වමින් කොළඹ දිසා අධිකරණය නිකුත් කළ තාවකාලික වාරණය ඉවත් කරන්නැයි ඉල්ලමින්   කොළඹ නාගරික මන්ත්‍රී මහින්දරත්න කහඳගම මහතා ඇතුළු වගඋත්තරකරුවෝ අද අධිකරණයට මොසමක් ඉදිරිපත් කළේය.

පැමිණිලිකරුවන් වෙනුවෙන් පෙනී සිටි නීතීඥවරයා අධිකරණයට කීවේ එම සංගමයේ සාමාජිකයන්ගෙන් දිනකට රුපියල් හැට දහසක් අය කරන බවයි. එය මසකට රුපියල් 18 ලක්ෂයක් බව ද නීතීඥවරයා කීවේය.

කහඳගම මහතා ඇතුළු වගඋත්තරකරුවන් වෙනුවෙන් පෙනී සිටි නීතීඥයා කීවේ එම මුදල් අය කරන්නේ විදුලිබිල හා වතුර බිල්වලට බවයි.

එවිට පැමිණිලි පාර්ශ්වයේ නීතීඥවරයා කීවේ ලයිට් බිල නොගෙවා ඇතැම් කඩවල විදුලිය විසන්ධි කර ඇති බවයි. මෙතරම් මුදලක් අය කළ ද අද වනතුරු ඒ සම්බන්ධ ගිනුම් වාර්තා ඉදිරිපත් කර නැතැයි ද ඔහු කීවේය.

දෙපාර්ශ්වයම ඉදිරිපත් කළ කරුණු සලකා බැලූ දිසා විනිසුරු සුජාතා අලහප්පෙරුම මහත්මිය තාවකාලික වාරණය ඉවත් කරනවාද නැද්ද යන්න ලබන 20 වැනි දා සලකා බලන බව කීවාය.