(සුජිත් හේවාජුලිගේ )

ඉන්ධන ගෑස් හා වෙනත් පෝලිම් සහ  විදුලිය කැපීම නිසා  වැඩ පැය  අහිමිවීමෙන් රුපියල් කෝටි 10,000 කට වැඩි මුදලක් රටට පසුගිය මාස කිහිපයේදී  අහිමිවී ඇතැයි   ආර්ථික විශ්ලේෂකයෝ සඳහන් කරති.

විදුලිය කැපීම නිසා කර්මාන්ත ශාලා ඇතුළු ව්‍යාපාරික ස්ථානවලට ඉකුත් මාස කිහිපයේදී  ඇතිවූ  බලපෑමද  අති විශාල බව එම ආයතන හිමියෝ  පවසති.

ඉන්ධන හිඟය නිසා භාණ්ඩ සහ මගී ප්‍රවාහනයද  දැනටමත් හරි අඩකින් පමණ  කඩා වැටී ඇතැයි  ප්‍රවාහන අමාත්‍යාංශ ආරංචි මාර්ගවලින් පැවසේ.

ඉන්ධන හිඟය සහ විදුලි කප්පාදුව ලක්ෂ ගණනක් කම්කරුවන්ගේ රැකියාවලටද  බරපතළ  තර්ජනයක් මතු කර ඇත. බලශක්ති අර්බුදය  නිදහස් වෙළෙඳ කලාප දාහතරේ  සහ ඉන් පිටත   කර්මාන්තශාලා 300 කට  බෙහෙවින් බලපා ඇති බව නිදහස් වෙළෙඳ කලාප ආයෝජකයන්ගේ සංගමයේ ලේකම් ධම්මික ප්‍රනාන්දු  මහතා පැවැසීය.

කර්මාන්තශාලාවල නිෂ්පාදන කටයුතු අඩාලවී ඇති බවත්, නිෂ්පාදන සහ අමුද්‍රව්‍ය ප්‍රවාහනයද  නිසි ලෙස කළ නොහැකිව  පවතින  බවත් ඔහු සඳහන් කළේ‍ය.

මේ තත්ත්වය  යටතේ  කර්මාන්ත වැසීගොස් ලක්ෂ 4 කට අධික කම්කරුවන්ගේ රැකියා අහිමිවීමේ අවදානමක්ද  මතුවී ඇතැයි වාර්තා වේ.

වසංගතය නිසා පසුගිය දෙවසර තුළ  පුද්ගලික අංශයේ කම්කරුවන් 1,50,000 කගේ පමණ  රැකියා අහිමි විය. ලක්ෂ දෙකකට අධික කම්කරුවන් සේවයේ නියුතු තේ සහ රබර් කර්මාන්තයද සෙසු මහාපරිමාණ සහ සුළු පරිමාණ  කර්මාන්තද ඒ ආකාරයෙන්ම ඉන්ධන හිඟයට සහ විදුලි කප්පාදුවට දැඩි ලෙස  මුහුණ දී ඇත.

රාජ්‍ය අංශයේ කම්කරුවන්ද මුහුණ දී සිටින්නේ ඒ හා සමාන අන්තරායකට බව  වෘත්තිය සංගම්  පෙන්වා දෙයි.

දිවයින පුරා පිහිටි හෝටල්, ආපනශාලා සහ බේකරිවලින් සියයට 60 කට වැඩි ප්‍රමාණයක්ද   ගෑස් හිඟය නිසා වසා දමා ඇති බව සමස්ත ලංකා ආපන ශාලා  හිමියන්ගේ සංගමයේ සභාපති අසේල සම්පත් මහතා ඉරිදා ලංකාදීපයට පැවසීය.එසේම ගෑස් හිඟය රටපුරා  ආදාහනාගාරවල ක්‍රියාකාරිත්වයටද බෙහෙවින් බලපා ඇතැයි  වාර්තා වේ.

මේ අතර ඉන්ධන නෞකා සඳහා ප්‍රමාද ගාස්තු ගෙවීම සඳහාත් අති විශාල මුදලක් අද   වැය කිරීමට සිදුවී ඇතැයි ඛනිජ තෙල් නීතිගත සංස්ථාව පවසයි.