(නිමල් ජයරත්න)

පොලොන්නරුව මහවැලි බී කලාපයට අයත් සිංහපුර මහවැලි කොට්ටාශයේ රොටවැව හරහා නිසිපරිදි තම කුඹුරුබිම් සඳහා ජලය නොලැබීමෙන් මෙවර යල කන්නයේ වගා කරන ලද කුඹුරු අක්කර 450 කට ආසන්න ප්‍රමාණයක් විනාශ වීමේ අවදානමක් පවතින බව කන්දකාඩු ගොවීහූ සඳහන් කරති.

රොටවැව වැවට ජල ප්‍රවාහන පද්ධතියක් නොමැති නිසා සිංහපුර දෙසින් එන ජලය ප්‍රමාණවත් නොවීමත්,   වැවේ ජලය සීග්‍රයෙන් අඩුවීම නිසා,මේ වනවිට කුඹුරු අක්කර 50 කට ආසන්න ප්‍රමාණයක පැළ ගොයම විනාශ වී ඇති බව 301 / ඩී 5, එස්.ඩී,2/3/ බෙදුම් ඇල ගොවි සංවිධානයේ සභාපති ඩී.එම්.ඩබ්ලිව්.ඩී. සුමිත්‍රපාල මහතා සඳහන් කළේය.

තම ගොවි සංවිධානයේ ගොවින් 136 දෙනෙකු මෙවර යල කන්නයේ අක්කර දෙකහමාර බැගින් වීවගා කර ඇති අතර එම වගාවට නිසිපරිදි ජලය නොලැබීම නිසා, තව සතියක් දෙකක් ඇතුළත වැවට ජලය ලබා නොදුනහොත් දින පහළොවේ, විස්සේ පැළ ගොයම සම්පූර්ණයෙන් විනාශ වීමේ අවධානමක් පවතින බවද සුමිත්‍රපාල මහතා කීය.

මෙම ගොවි සංවිධානයේ ජල පාලක ඩබ්ලිව්. ජී.ජී. ගුණතිලක මහතා සඳහන් කළේ රොටවැව යටතේ ඇලවල් දාහතරක් පවතින බවත්, වැවේ ජලය ප්‍රමාණවත් නොවීමෙන් එම ඇලවල් දාහතර, මගින් ජලය නිකුත් කිරීම ගැටලු සහගත තත්ත්වය පවතින බව‍යි.