ජනතා විමුක්ති පෙරමුණේ එක්සත් රාජධානි කොමිටුව සංවිධානය කළ 43 වනි ඉල්මහ විරු සමරු වැඩසටහනක් පසුගියදා ලන්ඩන් නුවරදී පැවැත්විණි.

ලන්ඩනය සහ ඒ අවට ප්‍රදේශ වලින් පැමිණි ජනතා විමුක්ති පෙරමුණු සාමාජිකයින් සහ හිතවතුන් සහභාගීවූ එම සමරු වැඩ සටහනේදී අන්තර් ජාලයේ ස්කයිප් තාක්ෂනය ඔස්සේ කොළඹ සිට පක්ෂයේ ප්‍රධාන ලේකම් ටිල්වින් සිල්වා සමරු දේශනයක් පැවැත්වීය.

එම දේශනයේදී "වත්මන් පාලනය යටතේ ශ්‍රී ලංකාව මුහුණ පා ඇති සමාජ ආර්ථික හා දේශපාලන අර්බුද කිසිවක් විසඳීමට නොහැකි බවත් ඒ සඳහා විසඳුමක් සැපයීමට පිරිහුණු සහ බිඳවැටෙමින් පවතින ධනේශ්වර ක්‍රමයට ආවඩන කිසිදු දේශපාලන පක්ෂයකට හෝ කණ්ඩායමකට නොහැකි බවත්" ඔහු පැවසුවේය.

ඒ සඳහා ඇති එකම විකල්පය නවීන සමාජවාදී වැඩපිළිවෙළක් බව පැවසු ටිල්වින් සිල්වා මහතා" ජනතා විමුක්ති පෙරමුණ එළිදක්වා ඇති ඉදිරි දැක්ම වැඩ පිළිවෙල හරහා සමාජවාදී සමාජ ක්‍රමයක් ගොඩනගා ගත හැකි" බවද පැවසීය. 

" පසුගිය පළාත් සභා මැතිවරණයේදී ජනතාව ජනතා විමුක්ති පෙරමුණ ජයග්‍රාහී මාවතකට ඔසවා තබා ඇති" බව පැවසු ඔහු සඳහන් කළේ "ඒ ශක්තිය හා විශ්වාසය මත ඉදිරි අනාගතයේදී ජනතා විමුක්ති පෙරමුණේ පාලනයක් ගොඩ නඟා ගැනීමට ශ්‍රී ලාංකික ජනතාව ජාතික හා ජාත්‍යන්තර ලෙස පෙළ ගැසිය යුතු බවයි.

විරු සමරු උත්සවය ආරම්භ වුයේ 1971 දී ජීවිතක්ෂයට පත්වූ පක්ෂ සාමාජිකයින් සිහිපත් කළේ තිබු සමරු ඵලකයක් ඉදිරියේ මල් පහන් තබා සමරු ගීය ගායනා කිරීමෙනි.

ජවිපෙ එක්සත් රාජධානි ශාඛාවේ සංවිධායක දර්ශන හෙට්ටිආරච්චි මුලසුනේ විය.

රන්ජිත් සිරිවර්ධන සහ සුනිල් ගමගේද කතා කළහ.