රන්බීර් කපූර් හා කත්‍රිනා කයිෆ් කියන්නේ පසුගිය අවුරුදු දෙක තුන තුළ බොලිවුඩයේ බොහෝ දෙනෙකුගේ කතාබහට ලක්වූ සිනමා පෙම්වතුන් යුවළක්. ඊයේ දිනයේදී (මාර්තු 10 වැනිදා) රන්බීර්, කත්‍රිනා දෙන්නා නැවතත් සිය කලා කටයුතු සඳහා සහභාගී වෙලා. ඒ අනුරාග් බාසු විසින් අධ්‍යක්ෂණය කරන "ජග්ගා ජාසස්" චිත්‍රපටයේ අවසන් රූපගත කිරීම් කිහිපය සඳහා. මේ අවුරුද්දේ ජුලී මාසයේ මේ චිත්‍රපටය ප්‍රදර්ශනය කිරීමට සැලසුම් කරලා තියෙන හින්දා "ජග්ගා ජාසස්" චිත්‍රපටයේ වැඩ නිම කරන්නට චිත්‍රපට කණ්ඩායම මේ දිනවල ගොඩක් මහන්සි වෙනවා කියලා ආරංචියි. 

ඒ හින්දා තමන් භාරගත්තු වැඩ ටික ඉවර කරන්න කියලා රන්බීර් වගේම කත්‍රිනාත් දකුණු අප්‍රිකාවේ කේප්ටවුන්වල ඉන්න මේ චිත්‍රපට කණ්ඩායමට එකතු වෙලා දැන් වැඩ කරනවාලු. ඒත්, දෙන්නා එකිනෙකාගේ මුහුණවත් නොබලමින් වැඩ කරනවා කියලා තමයි තොරතුරු වාර්තා කරන්නේ. මේ චිත්‍රපටයේ වැඩ ආරම්භ කරපු දවස්වල් නම් රන්බීර් එක්ක කත්‍රිනා කිරි-පැණියි වගේ හිටියේ. ඒත්, ඉතින් දැන් මේ දෙන්නාගේ ප්‍රේම සම්බන්ධය නවත්වලා හින්දා රන්බීර් මුණගැහෙන හැම වෙලාවෙම කත්‍රිනා මූණ අනෙක් පැත්තකට කරගෙන රන්බීර්ගේ කතාවලට උත්තර දෙනවා කියලා තමයි අන්තර්ජාලයේ සඳහන් වෙන්නේ.

බුද්ධික සේනාධීර