(ඩයනා උදයංගනී)

යල කන්නයේ වගා කටයුතු සඳහා අවශ්‍ය මෙට්‍රික් ටොන් 65,000 ක පොහොර තොගයක් ලබන මස 6 වැනිදා මෙරටට ලැබෙන බව සම කැබිනට් ප්‍රකාශක, කෘෂිකර්ම අමාත්‍ය මහින්ද අමරවීර මහතා පැවසීය.

ඉන්දියානු ණය යෝජනා ක්‍රමය යටතේ ලැබෙන මෙම පොහොර තොගය ඕමානයේ සිට ඉන්දියාවට පොහොර රැගෙන එන නෞකාවෙන් මෙරටට රැගෙන ඒමට නියමිත බව කී ඇමතිවරයා පොහොර තොගය ලැබුණු පසු ඇසුරුම් කර ලබන 15 වැනිදා සිට ගොවීන්ට ලබාදීමට කටයුතු කරන බව සඳහන් කළේය.

අමාත්‍ය මහින්ද අමරවීර මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද (21) පැවති කැබිනට් තීරණ දැනුම්දීමේ මාධ්‍ය හමුව අමතමිනි.

ඉන්දියාවෙන් ගෙන්වන පොහොරවල ප්‍රමිතිය ගැන ගැටලුවක් ඇති බවට නැගෙන චෝදනා සම්බන්ධයෙන් මෙහිදී මාධ්‍යවේදියකු නැගූ පැනයකට පිළිතුරු දෙමින් ඇමතිවරයා පැවසුවේ ගොවි ජනතාවට හානිකර බාල පොහොර ලබානොදෙන බවත්, ඒවායේ පරීක්‍ෂණ වාර්තා ඉදිරිපත් කිරීමට තමන් සූදානම් බවත්ය.

දිව්‍ය ලෝකෙන් අමෘතය ගෙනත් දුන්නත් ලුණු මදි කියන අය මෙන් පොහොරවල ද වැරදි කියන පිරිසක් සිටින බව කී ඇමතිවරයා මෙවැනි අසත්‍ය ප්‍රචාර සිදුකරන්නේ ඔවුන් බව ද පැවසීය.

එමෙන්ම පසුගිය දිනවල හරවා යැවූ ප්‍රමිතියෙන් තොර පොහොර නෞකාව වෙනුවට ලැබෙන බව කී ප්‍රමිතියෙන් යුත් පොහොර තවමත් නොලැබුණේ ඇයිදැයි යොමුවූ පැනයකට පිළිතුරු දෙමින් ඇමතිවරයා පැවසුවේ එහි මෙරට ලංකාවේ නියෝජිතයා ගෙන්වා මේ ගැන අපි සාකච්ඡාවක් පැවැත්වූ බවත්, එම මුදල අයකරගැනීමට හෝ සුදුසු පොහොර ගෙන්වන ලෙස තමා වගකිවයුත්තන්ට උපදෙස් දුන් බව ද සඳහන් කළේය.