(ඩයනා උදයංගනී)

දින කිහිපයක් තිස්සේ ඇදහැලුණු මහ වැසි සමඟ දිස්ත්‍රික්ක 10කට බලපෑ ගං වතුර සහ නායයෑම් හේතුවෙන් දින හතරක් තුළ දී සිදුවූ මරණ සංඛ්‍යාව 19ක් දක්වා ඉහළ ගොස් ඇතැයි ආපදා කළමනාකරණ මධ්‍යස්ථානය පවසයි.

තවත් අයෙක් අතුරුදන්ව සිටින බව ද එම මධ්‍යස්ථානය සඳහන් කරයි.

මෙම ආපදා තත්වයෙන් පවුල් 55,428 කට අයත් 2,19,870 කට වැඩි පිරිසක් තවමත් පීඩාවට පත්ව සිටින බව ආපදා කළමනාකරණ මධ්‍යස්ථානයේ සහකාර අධ්‍යක්‍ෂ (පූර්ව දැනුම්දීම්) ප්‍රදීප් කොඩිප්පිලි මහතා පැවසීය.

ගම්පහ, රත්නපුර, කොළඹ, පුත්තලම, කළුතර, නුවරඑළිය, කෑගල්ල, මහනුවර, කුරුණෑගල සහ ගාල්ල දිස්ත්‍රික්කවල ජනතාව මෙයින් පීඩාවට පත්ව සිටිති.

සිදුවූ මරණ අතරින් පහක් කෑගල්ල දිස්ත්‍රික්කයෙන් වාර්තා වී ඇති අතර, කළුතර දිස්ත්‍රික්කයෙන් මරණ හතරක්, රත්නපුර දිස්ත්‍රික්කවලින් මරණ තුන බැගින් ද, කොළඹ සහ ගාල්ල දිස්ත්‍රික්කවලින් මරණ එක බැගින් ද වාර්තා වී ඇතැයි ද කොඩිප්පිලි මහතා සඳහන් කළේය.