(රෝෂන් තුෂාර)

රජයේ රැකියා ලබාදෙන බව පවසා රුපියල් 350,000ක මුදලක් ලබාගත්තේ යැයි කියන මධ්‍යම පළාත් සභාවේ හිටපු විපක්ෂ නායක දොන් හරින්ද්‍ර චානක අයිලප්පෙරුම ඇප මත මුදාහැරීමට කොළඹ ප්‍රධාන මහේස්ත්‍රාත් තනුජා ලක්මාලි මහත්මිය අදb(28) නියෝග කළාය.

රුපියල් ලක්ෂ පහක ශරීර ඇප දෙකක් නියම කළ ප්‍රධාන මහේස්ත්‍රාත්වරිය සැකකරුගේ විදෙස් ගමන් තහනම් කිරීමටද නියෝග කළාය.

සැකකාර විපක්ෂ නායකවරයා  පැමිණිලිකරුවන්ගේ දරුවන්ට රැකියා ලබා දෙන බවට පවසා 2019 වසරේ දී ලබා ගන්නා ලද මුදල් 2022 වසරේදී සිදුවූ වරද පිළිගනිමින් ආපසු ගෙවා ඇති බවට ඔහු වෙනුවෙන් පෙනී සිටි නීතිඥවරයා කළ කරුණු සැලකිරීම් හා අල්ලස් කොමිසමේ විමර්ශන අවසන් බවට කොමිසම ඉදිරිපත් කළ කරුණු සලකා බැලීමෙන් පසුව ප්‍රධාන මහේස්ත්‍රාත්වරිය ඇප නියම කළාය.

ලංකා ඛනිජ තෙල් සංස්ථාවේ සහ විදුලි බල මණ්ඩලයේ රැකියා ලබා දෙන බවට පවසා 2019 වසරේදී පුද්ගලයන් දෙදෙනකුගෙන් රුපියල් 200,000ක් සහ රුපියල් 150,000ක මුදල් ඉල්ලා ලබාගනිමින් අල්ලස් පනතේ දූෂණය නම් වරද සිදුකිරීමට එරෙහිව සැකකරු අධිකරණයට ඉදිරිපත් කෙරිණි.

සිද්ධිය සම්බන්ධයෙන් පසුගිය 26 වැනි දින අල්ලස් කොමිසම මගින් අත්අඩංගුවට ගත් සැකකරු එදින මහනුවර මහේස්ත්‍රාත් වරයාට ඉදිරිපත් කිරීමෙන් පසුව අද (28) දින දක්වා රක්ෂිත බන්ධනාගාර ගත කළේය.