(සුජිත් හේවාජුලිගේ)

පාර්ලිමේන්තු සංකීර්ණයේ ජයන්තිපුර සහ පින්නියර ආරක්ෂක ගොඩනැගිලිවල  ප්‍රතිසංස්කරණය කිරීමේ කටයුතු නාගරික සංවර්ධන අධිකාරියට  පැවරීමෙන් පාලනාධිකාරිය  ප්‍රසම්පාදන ක්‍රියා පටිපාටිය කඩ කර ඇතැයි  ජාතික විගණන කාර්යාලය නිකුත් කළ වාර්තාවක සදහන් වේ.

නාගරික සංවර්ධන අධිකාරිය මෙවැනි කටයුතු සඳහා විශේෂිත ආයතනයක් නොවන බවද  එම වාර්තාවේ දැක්වේ. මෙම ආරක්ෂක ගොඩනැගිලි ප්‍රතිසංස්කරණය කිරීම පැවරී තිබුණේ රුපියල් කෝටි  අටකට ආසන්න  ඇස්තමේන්තුගත මුදලකටය.

මේ අතර එම ගොඩනැගිලි ඉදිකිරීම සඳහා  බාහිර උපදේශන පාර්ශවයෙන් අවශ්‍ය උපදෙස් නිසියාකාරව ලබාගෙන නොතිබීමෙන්  මූලික ඇස්තමේන්තු   සියයට අසූ දෙකකින් සියයට එකසිය තිස්තුනකින් සහ සියයට 84 කින්   වැඩිවී තිබූ බව වාර්තාව සඳහන් කරයි.

තවද අමාත්‍ය මණ්ඩල තීරණය අනුව ආරක්ෂක ගොඩනැගිලිවල ප්‍රතිසංස්කරණ කටයුතු සඳහා ශ්‍රී ලංකා නාවික හමුදාවේ මිනිස් බලය යොදාගත යුතු වුවත්  පින්නියර ආරක්ෂක ගොඩනැඟිල්ලේ ප්‍රතිසංස්කරණ කටයුතු සඳහා පෞද්ගලික කොන්ත්‍රාත්  ආයතනයක දස දෙනෙකු  සේවයේ යොදවා තිබූ බව වාර්තාවේ දැක්වේ.