ආණ්ඩුවෙ ඉන්න බොහොම දැන උගත් සංයමයෙන් කතා කරන ඇමැතිසයිස් මහත්තයෙකුට පසුගිය දවසක මල පැනල ඒකාබද්ධ කස්ටිය එක්ක ඉන්න කටකාර ආර්ථික විසේසඥයකුට කවුන්සිලේදීම බැණගෙන බැණගෙන ගියා...

මේ දොස් පරොස් අහපු විපක්ෂ ලොක්ක පුදුම වුණා. කවදාවත් මේ මට්ටමට නොවැටෙන ජ්‍යෙෂ්ඨ ආචාර්ය තැනට මේ මොකද වුණේ කියල මැතිසබා ලොබිය පැත්තෙ කතා කර කර ඉන්නකොට හිරිමල් වියේ ඉන්න තරැණ හැඩකාර මන්ත්‍රී නෝන කෙනෙක් කට කොනින් හිනාවුණා. ඒ හිනාවෙ මොකක් හරි රහසක් ඇතිය කියල හිටපු ඒකාබද්ධ විපක්ෂයෙ මහත්තය හෙමින්ම අර නෝනගෙ කනට කරල ඇහුව මොකද ඔයා හිනාවුණේ? ඔයා මොනව හරි දන්නව වගෙයි කියල...

ඔන්න ඊට පස්සෙ පොරොන්දු පිට ඒ නෝන රහස ටිකක් එළි කළාලු... මේ බැණුම කරපු ලොකු මහත්තය කලක් කිට්ටුවෙන්ම ඇසුරැ කරපු දකුණට සම්බන්ධ සුන්දර දේශපාලන ලලනාවක් දැන් එතුමා එක්ක අමනාපලු. ඒකට හේතුවත් දේසපාලන පක්ෂ මාරැ කතාවක් කියල කියනව.

ඉතින් කොහොම හරි දකුණෙ සුන්දර ලලනාවගෙ පක්ෂ රුස්වීමක ඒකාබද්ධ විපක්ෂයෙ ආර්ථික විසේසඥතුමා එදා උදේ ලොකු කතාවක් කරල අර ලලනාවට ජනතාවගේ ලකුණු ගොඩක් අරන් දුන්න කියන ආරංචිය අහපු ආණ්ඩුවෙ ජ්‍යෙෂ්ඨයට උන්හිටි තැන් අහිමිවෙලා මල පැන්නලු. ඊට පස්සෙ ආපු පළවෙනි කතාවෙන් හිටු කියල ආර්ථික විසේසඥයට නෙළුවලු... ඒකයි රහස... මේ කතාව අහපු ඒකාබද්ධ විපක්ෂෙ මහත්තයට මෙහෙම කිය වුණා.

"බලන්නකො අනේ ප්‍රේමය වෛරයට හැරැණම පැත්තක ඉන්න අපටනේ කන්න වෙන්නෙ"