නවපරපුර අතර වඩාත් ජනප්‍රිය බොලිවුඩ් සිනමා නළුවෙකු වන අර්ජුන් කපූර් මේ දිනවල පැසිපන්දු ක්‍රීඩාව ප්‍රගුණ කරමින් සිටින බව බොලිවුඩ් ආරංචි මාර්ග සඳහන් කරනවා. අර්ජුන් මෙසේ පැසිපන්දු ක්‍රීඩාව ප්‍රගුණ කිරීමට හේතුව වී ඇත්තේ මෝහිත් සූරී අධ්‍යක්ෂණය කරන 'හාෆ් ගර්ල්ෆ්‍රෙන්ඩ්' චිත්‍රපටයට බව සඳහන්. මෙම චිත්‍රපටයේ රූපගත කිරීම් කටයුතු පසුගියදා ආරම්භ කළ අතර, චිත්‍රපටය ලබන වසරේ මුල් භාගයේදී ප්‍රදර්ශනය කිරීමට සැලසුම් කර තිබෙනවා.

අර්ජුන් මෙම චිත්‍රපටයේ ජාත්‍යන්තර මට්ටමේ පැසිපන්දු ක්‍රීඩකයෙකු ලෙස චරිත නිරූපණය කරන අතර, ඔහු ඇමෙරිකාවේ ප්‍රබල ක්‍රීඩා සමාජයක් සමග එක්ව මුහුණ දෙන අපුර්වතම සිදුවීම් පෙළක් මෙම චිත්‍රපටයේ කතා තේමාවට ඇතුළත් කර තිබෙන බව සඳහන්. කෙසේ වෙතත්, තවමත් මෙම චිත්‍රපටය සඳහා නිළි චරිතයක් තෝරා ගෙන නොමැති බවත්, දැනට ඒ සඳහා නම් කිහිපයක් යෝජනා වී ඇති බවත් තොරතුරු සඳහන්. ඔවුන් අතර, ක්‍රිති ෂැනොන්, ශ්‍රද්ධා කපූර්, ජැක්ලින් ෆර්නැන්ඩෙස් හා ආලියා භාට්ගේ නම් යෝජනා වී ඇති බවත් තොරතුරු ලැබෙනවා.