(සුජිත් හේවාජුලිගේ සහ නිමන්ති රණසිංහ)

ශ්‍රී ලංකා හදබිම අධිකාරිය ප්‍රතිලාභී පවුල් 10680 කට බෙදාදීම සඳහා මිලදීගෙන තිබූ රුපියල් දෙකෝටියකට ආසන්න වටිනා  කෘෂි උපකරණ පසුගිය වසරේ ජනවාරි 25 වැනිදා වනවිටත් ප්‍රයෝජනයට නොගෙන  ගබඩා කර තිබිණැයි  ජාතික විගණන කාර්යාලය නිකුත් කළ වාර්තාවක සඳහන් වේ.

මේ කෘෂි උපකරණ අතර උදලු තල 2670ක්ද උදලු මුල්ලු 6102ක්ද සවල් 6102ක් හා  මල් බාල්දි 5929ක්දවූ බව ජාතික විගණන කාර්යාලය පවසයි.

මේ අතර  කාබනික පොහොර නිෂ්පාදන වැඩසටහන යටතේ තෝරාගත් ප්‍රතිලාභීන් සඳහා බෙදා දීමට  2020 වර්ෂයේදී  මිලදී ගන්නා ලද රුපියල් ලක්ෂ හැත්තෑ පහකට වැඩි වටිනා කෘෂි උපකරණ කට්ටල 1880ක්ද ප්‍රතිලාභීන්ට ලබා නොදී ගබඩාවල රඳවා තිබූ බව එම වාර්තාවේ දැක්වේ.

තවද අධිකාරියට අයත් රුපියල් ලක්ෂ දහයක් වටිනා කැබ් රථයක් සහ රුපියල් ලක්ෂ දෙකක් වටිනා අත් ට්‍රැක්ටරයක් වසර තුනක කාලයක් තිස්සේ භාවිතයෙන් තොරව දිරාපත් වෙමින් පැවතුණු  බව  විගණන අංශ පෙන්වා දෙයි.

කෘෂිකර්ම දෙපාර්තමේන්තුවට අයත් කුණ්ඩසාලේ ඉඩමක රුපියල් ලක්ෂ 45 ක් වැයකර 2017 වර්ෂයේ දී ඉදිකරන ලද අලෙවි ගොඩනැගිල්ල සඳහා ජලය සහ විදුලිය ආදී පහසුකම් ලබාදීම සඳහා කෘෂිකර්ම දෙපාර්තමේන්තුව අවසර ලබා නොදීම හේතුවෙන් එම ගොඩනැගිල්ල පාවිච්චි නොකර පැවතුණු බව විගණන නිලධාරීහු පෙන්වා දෙති.

එම ගොඩනැඟිල්ල පාවිච්චි කිරීමට කෘෂිකර්ම දෙපාර්තමේන්තුව විරුද්ධත්වය ප්‍රකාශ කර තිබූ බවද වාර්තාවේ සඳහන් වේ.

මේ තොරතුරු සඳහන් වන්නේ පාර්ලිමේන්තුවට පසුගියදා ඉදිරිපත් කෙරුණු  ශ්‍රී ලංකා හදබිම  අධිකාරියේ 2021 වාර්ෂික වාර්තාවට ඇතුළත් කරනු ලැබ ඇති විගණන වාර්තාවේය.