(සිසිර කැලේගම)

පොල්පිතිගම නිකවැහැර විද්‍යාලයේ 2 වසරේ සිසුවකුගේ බෙල්ලට තවත් සිසුවකු ඇන   තිබූ ගෙතුම් කට්ටක් (වූල් කට්ටකින්) පැය තුන හමාරකට පමණ ශල්‍යකර්මයකින් පසුුව  ගැල වූ බව කුරුණෑගල ශික්ෂණ රෝහලේ ප්‍රකාශකයෙක් කීය. 

පාසල පටන් ගැනීමෙන් අනතුරුව උදේ කාලයේ දී පංති කාමරය තුල දී සිසුුන් දෙදෙනා අතර ඇති වු ආරවුලක් අතරතුර නිවසේ සිට ගෙනෙන ලද මෙම උපකරණය පාසල් බෑගයේ සඟවාගෙන සිටි එක් සිසුවකු අනෙක් සිසුවාගේ බෙල්ලට ඇණීමෙන් එය ශරීරය තුළට කිදා බැස තිබුණු එම කට්ට ගලවා ගත නොහැකිවී ඇත.

සිසුවා වේදනාවෙන් කෑ ගැසීම දුටු ගුරුවරු හා සිසුන් කලබළයට පත්ව ඇති අතර ඒ අවස්ථාවේ දී විදුහල්පති සුනිල් පේමරත්න මහතා තවත් ගුරුවරයකුගේ සහාය ඇතිව  යතුරු පැදියකින්  සිසුවා පොල්පිතිගම මුලික රෝහලට ඇතුලත් කළ බව රෝහල් සේවකයෙක් පැවසීය.

පොල්පිතිගම රෝහලේ දී පවා එය ඉවත් කිරීමට අවශ්‍ය පහසුකම් නොමැති නිසා සිසුුවා ඒ අකාරයෙන්ම කට්ට පිටින්ම කුරුණෑගල ශික්ෂණ රෝහලට කඩිිනමින් ගිලන් රථයයෙන් මාරු කර යවා ඉන් අනතුරුව එක්ස් රේ වාර්තා ලබාගෙන ඉන්ද්‍රිය පද්ධතියට හානියක් නොවන ආකාරයට සිද්ධියෙන් පැය තුන හමාරකට පමණ පසුව සැත්කමකින් එය ඉවත් කළ බවත්, සිසුවා දැනට  නේවාසිකව ප‍්‍රතිකාර ලබන බවත් කුරුණෑගල රෝහල් ආරංචි මාර්ග පවසයි.