(විමුක්ති එස් රුද්‍රිගු)

තෙවැනි චාල්ස් රජුගේ රාජාභිෂේක උත්සවය ලබන 6 වෙනිදා වෙස්ට්මිනිස්ටර් ඇබී දේවස්ථානයේ දී පැවැත්වීමට නියමිතව ඇත.

දෙවැනි එලිසබත් රැජිනගේ රාජාභිෂේක උත්සවයට 1953 වසරේදී අට දහසකට ආසන්න පිරිසක් සහභාගි වුවත් මෙවර තෙවන චාල්ස් රජු ගේ රාජාභිෂේක උත්සවයට සහභාගී වන පිරිස 2,000 කට සීමා කිරීමට චාල්ස් රජු තීරණය කර ඇත.

රාජාභිෂේක උත්සවයේ ආරක්ෂාව සඳහා ආරක්ෂක අංශ සාමාජිකයන් පන්දහසක් පමණ සහභාගි වීමට නියමිත අතර රාජාභිෂේක උත්සවය වෙනුවෙන් ක්‍රියාත්මක කරනු ලබන මෙම හමුදා මෙහෙයුම ලොව උත්සවයක් වෙනුවෙන් දියත් කරනු ලබන විශාලතම හමුදා මෙහෙයුම්වලින් එකක් බවද පැවසෙයි.

රාජාභිෂේක උත්සවයේ දී එක්සත් රාජධානිය සන්නද්ධ හමුදාවන්හි සේවය කළ ප්‍රවීනයන් සහ සෞඛ්‍ය සේවකයන් හාරදහසකට පමණ බකිංහැම් මාලිගය ඉදිරිපිට ඉදිකරන විශේෂ ශාලාවක රාජාභිෂේක පෙරහැර නැරඹීම සඳහා අසුන් ගැනීමට අවස්ථාව සලසා දී ඇත.

රාජාභිෂේක උත්සවය ට සසෙක්ස් හි ආදිපාදවරයා වන හැරී කුමරු සහභාගි වූවත් සසෙක්ස්හි ආදිපාදවරිය වන මේගන් මාර්කෙල් කුමරිය සහභාගී නොවන බව පැවසෙයි.

චාල්ස් රජුගේ රාජාභිෂේක උත්සවයට ආරාධනා නොලත් පාර්ශ්ව අතර රුසියාව සහ මියන්මාරය යන රටවල් ද වේ.

එසේම ඇන්ඩෘ කුමරු ගේ හිටපු බිරිඳ වන සාරා ෆර්ගියුසන් හටද රාජාභිෂේක උත්සවය සඳහා ආරාධනා කර නොමැත