(ජී.සුගතපාල ,සුමතිපාල දියගහගේ)

ගාල්ල මහ නගර සභාවේ 2026 වසර සදහා ඉදිරිපත් කරණ ලද අයවැය ලේඛණය පිළිබඳ දෙවන වර ඡන්ද විමසිමේදි විපක්ෂයි කියු මන්ත්‍රිවරුන් හතර දෙනකු පක්ෂයි යනුවෙන් පැවසු බවට සටහන් කොට අනිතික ලෙස අයවැය සම්මත වු බවට ලේඛණ ගතකිරිම සම්බන්ධයෙන් පරික්ෂණයක් පවත්වන ලෙස ඉල්ලා ඒකාබද්ධ විපක්ෂ කණ්ඩායම අද සවස දකුණු පළාත් පාලන සහකාර කොමසාරිස් මංජුල ප්‍රියන්ත පෙරේරා මහතාට පෙත්සමක් බාර දෙන ලදි.

ඒ සමගම විපක්ෂයේ මන්ත්‍රිවරු 19දෙනා තමන් අයවැයට විපක්ෂව ඡන්දය ප්‍රකාශ කළ  බවට දිව්රුම් ප්‍රකාශ 19ක්ද පළාත්පාලන සහකාර කොමසාරිස්වරයාට බාර දුන්නේය.

මෙයට අමතරව ගාල්ල ශ්‍රි ලංකා නිදහස් පක්ෂයේ ප්‍රධාන සංවිධායක සුසන්ත කරුණාරත්න මහතා ද තමන් විපක්ෂයි කියුවත් ලේකම්වරිය පක්ෂයි යනුවෙන් සටහන්කර අයවැය සම්මත කිරිමට සහාය දැක්විම සම්බන්ධයෙන් පරීක්ෂණයක් පවත්වන ලෙස ඉල්ලා ගාල්ල පොලිසියට  පැමිණිල්ලක්ද ඉදිරිපත්කර ඇත.

ගාල්ල මහ නගර සබාවේ අයවැය පිළිබද පළමු වරට ඡන්ද විමසිම දෙසැම්බර් 15 වැනි දින පැවැති අතර එහිදි වැඩි ඡන්ද දෙකකින් අයවැය පරාජයට පත්විය.

පසුව දෙවන වරට ඉකුත් 24වනදා ඡන්ද විමසිම පවත්වන ලද අතර එහිදි මන්ත්‍රිවරුන්ගේ නමින් ඡන්ද විමසිම පවත්වන ලදි.

එහිදි නගරාධිපතිවරයා සභාවට දැනුම් දුන්නේ අයවැයට පක්ෂව ඡන්ද 21ක්ද විපක්ෂව ඡන්ද 15ක් ලැබි ඇති බවය.

ඒ අනුව අයවැය සම්මත වු බව පැවසිමත් සමග විපක්ෂයේ මන්ත්‍රිවරුන්  සභාව තුළ කලබලකාරි ලෙස හැසිරෙන්නට විමත් සමග පොලිසිය කැඳවිමටද සිදුවිය.

පසුව ඒකාබද්ධ විපක්ෂයේ මන්ත්‍රිවරුන්ගේ යෝජනා ස්ථිරත්වයෙන් එක්සත් ජාතික පක්ෂයේ ජිලිත් නිශාන්ත මන්ත්‍රිවරයා වැඩ බලන නගරාධිපති ලෙස පත්කර ගෙන ලේකම්වරිය බලෙන් කැඳවාගෙන විත්  නැවත ඡන්ද විමසිම පවත්වන ලදි. එහිදි අයවැයට විපක්ෂව ඡන්ද 17ක් ලැබුන අතර පක්ෂව එකම ඡන්දයක්වත් ලැබුනේ නැත.

ඒ අනුව ලේකම්වරිය දූෂණයක් සිදුකර ඇති බව පවසා විපක්ෂ මන්ත්‍රිවරුන් පිරිස දිව්රුම් ප්‍රකාශ සමග මෙම පෙත්සම බාර දෙන ලදි.