(ජේ.කේ.එල්. චාමින්ද)

ධාරාණිපාත වර්ෂාවත් සමඟ ගිංගඟ පිටාර ගැලිම නිසා ගිංගග ඉහළ නිම්නයේ හා පහළ නිම්නයේ පහත්බිම්  ඇතුළු මාර්ග රැසක් ජලයෙන් යටවි ඇතිබැව් ගාල්ල දිස්ත්‍රික් ආපදා කළමණාකරණ මධ්‍යස්ථානය පවසයි.

අද (02) උදැසන 9.00ට වනවිට ගිංගගේ බද්දේගම ජලපාමනයේ ජල මට්ටම  මිටර් 4.22 දක්වා වැඩි වි ඇති අතර මේ වනවිට බද්දේගම ප්‍ර දේශයට සුළු ගංවතුර තත්ත්වයක්  ඇතිවි තිබේ.

එමෙන්ම ගිංගග ඉහළ නිම්නයේ තවලම ජල මාපකයේ ජල මට්ටම අද (02) මිටර් 7.44 දක්වා වැඩි වි ඇත.

ගිංගඟ ඉහත්තාවේ මහා ගංවතුර තත්ත්වයකට ආසන්න වෙමින් පවතින අතර  ගිංගග ඉහත්තාවේ මාර්ග රැසක් මේ වනවිට ජලයෙන් යටවි ඇත.

ගිංගගේ ජල මට්ටම ද  වේගයෙන් වැඩිවෙමින් පවතින  බව වාරිමාර්ග දේපාර්තමෙන්තුව පවසයි

ඉකුත් පැය විසිහතර තුල ගිංගග ඉහල නිම්නයට මිලිමිටර්  234.8ක වර්ෂාපතයක් ලැබි ඇති අතර පහළ නිම්නයට මිලිමිටර්  92.5ක වාර්ෂාපතනයක් ලැබි ඇති බව ආපදා කළමණාකරණ මධ්‍යස්ථානය පවසයි. 

හිනිදුම නෙළුව මාර්ගයේ ස්ථාන කිහිපයක් ජලයෙන් යටවි ඇති අතර මේ නිසා වාහන ගමනා ගමනයට ද බදා එල්ලවි ඇත.

 ආපදාතත්ත්වයෙන් විපතට පත් ජනතාවට සහන සැලසිම සදහා  නෙළුව හා තවලම යන ප්‍ර දෙශවල ස්ථාන හතරක නාවික හමුදාවේ සහ යුධ හමුදාවේ කණ්ඩායම් හතරක් යොදවා ඇති බව ගාල්ල දිස්ත්‍රික් ආපදා කළමණාකරණ මධ්‍යස්ථාන පවසයි.

ගංවතුරෙන්  විපතට පත් ජනතාව බේරාගැනිම සදහා  එම ප්‍ර දේශවලට බෝට්ටු හතරක් යොදවා ඇති බවද ආපදා කළමණාකරණ මධ්‍යස්ථානය පවසයි.

මේ අතර දක්ෂිණ අධිවේගී මාර්ගයේ පින්නදුවත් ඉමදුවත් අතර කොටසේ අධිවේගී මාර්ගයට පහතින් දිවෙන උමං මාර්ග හතරක් ජලයෙන් යටවි  ඇත.

මේ හේතුවෙන් මෙම උමං මාර්ග හරහා ගමන් කරන ජනතාවට සහ රථවාහන වල ගමනා ගමන කටයුතු සදහා බාදා එල්ලවි  තිබේ.