(පියදාස සමරවීර සහ හේමන්ත රණසූරිය)

කැබිතිගොල්ලෑව නගරයේ පැවැත්වෙන සංගීත සංදර්ශනයකට පිරිස වැඩි වශයෙන් ගෙන්වා ගැනීමට කැබිතිගොල්ලෑව ප්‍රදේශයේ ප්‍රාථමික පාසල සිසුනට නොමිලයේ ටිකට් ලබා දී මව්පියන්ද සහෝදර සහෝදරියන් ද සමග සංගීත සංදර්ශනය නැරැඹීට පැමිණෙන්නැයි දැනුම් දීමෙන් තමන් අපහසුතාවයට පත්ව ඇතැයි ප්‍රදේශයේ මව්පියෝ පවසති.

එදාවේලවත් කන්නවත් නැති මොහොතක කුඩා දරුවන්ට පමණක් නොමිලේ ප්‍රවේශපත්‍ර දී සංගීතය නැරැඹීයට මව්පියන් සහ වැඩිහිටියන් ද රැගෙන ආ යුතු බව ගුරුවරුන් පැවැසුවේ යැයි එම දරුවන් මව්පියන්ට පවසා ඇතැයි කියති.

මේ මොහොතේ සංගීතයක් නැරැඹීමට තරම් මුදලක් තමන් සදුව නැතැයි මව්පියෝ කියති. 

දරුවන් අඬනවා සංගීතය බලන්න යමු කියල.නමුත් එක් ටිකට් එකක් රුපියල් 400ක්. අපි කොහොමද රුපියල් 400 වැය කරන්නේ  දරුවන් මානසිකව වැටිල ඉන්නේ. බරපතලම ගැටළුව අපි මේ පාසලට යන්න ඕනේ යකාවැව, කණුගහවැව, කහටගොල්ලෑව, වැනි දුෂ්කර ගම්මානවල ඉඳන්  රෑට අලි කරදර. රෑ 8.00ට ආරම්භ කරන සංගීතය බලලා අපි මහ රැ යන්නේ කොහොමද අලි ගහයි අපට.  ගුරුවරු මේ ගැන ටිකක් හිතන්න තිබුණා යැයි මවු පියෝ කියති.

මෙම පාසලේ දරුවන් 518 දෙනකු දැනට අධ්‍යාපනය ලබන බවත් 

මෙම සංගීත සංදර්ශනය සංවිධානය කර ඇත්තේ ප්‍රදේශයේ උපකාරක පන්ති ගුරුවරයකු සහ කැබිතිගොල්ලෑව ප්‍රථමිකයේ මුරුකරු සමග එකතුව බව ද ඔවුහු චෝදනා කරති. පාසලේ මුරකරු එහි විදුහල්පතිනියේ ළඟම ඥාතියකු බව ද ඇතැම් මව්පියෝ චෝදනා කරති.

මේ සම්බන්ධයෙන් කැබිතිගොල්ලෑව කොට්ඨාස අධ්‍යාපන අධ්‍යක්ෂිකා අනුරී උත්පලා මහත්මියගෙන් විමසීමේදී මෙසේ කීවාය. නොමිලේ ටිකට් පත් දුන්නාදැයි තමන් දන්නේ නෑ. ඒ සම්බන්ධයෙන් සොයා බලනවා.

කැබිතිගොල්ලෑව කලාප අධ්‍යාපන අධ්‍යක්ෂිකා කුමුදුනී ආරියවංශ මහත්මියගෙන් විමසීමක් කළෙමු. ඒ සම්බන්ධයෙන් මෙසේ කීවාය. මේ සම්බන්ධව මවුපියන් ලිඛිතව දන්වලා නෑ. ලිඛිතව ඇයට දැනුම් දෙන ලෙස මව්පියන් දැනුම්වත් කරන්නැයි මාධ්‍යවේදීන්ගෙන් ඉල්ලීමක් කළාය.

උතුරු මැද පළාත් අධාපන අධ්‍යක්ෂ එම්.ඩබ්ලිව්. සමරකෝන් මහතා සහ කැබිතිගොල්ලෑව ප්‍රාථමිකයේ විදුහල්පතිනිය සම්බන්ධ කර ගැනීමට ගත්  අසාර්ථක විය.