අනුරාධපුර ගුවන් හමුදා කඳවුරට ප‍්‍රහාර එල්ල කර ගුවන් යානා 16ක් විනාශ කර රුපියල් කෝටි හාර සියයක අනර්ථයක් සිදු කිරීම හා ආරක්ෂක අංශ සාමාජිකයන් 14 දෙනකු මරණයට පත් කළැයි රිමාන්ඩ් කර සිටින එල්ටීටීඊ සංවිධානයේ ගුවන් බළගනයේ සාමාජිකයින් දෙදෙනා ඇප මත මුදා හරින ලෙස නීතිඥයින් කළ ඉල්ලීමක්   අනුරාධපුර විශේෂ මහාධිකරණයේ විනිසුරු ඛේමා ස්වර්ණාධිපති මහත්මිය  යළි ප‍්‍රතික්ෂේප කළාය.

ඒ අනුව මෙම ත‍්‍රස්තවාදින් දෙදෙනා ලබන මැයි මස 2 වැනිදා දක්වා රිමාන්ඩ් බාරයේ තැබිමටද මහාධිකරණ විනිසුරුවරිය නියෝග කළාය.

අනුරාධපුර ගුවන් හමුදා කදවුර ප‍්‍රාහාරය සමිබන්ධයෙන්  අනුරාධපුර විශේෂ මහාධිකරණය හමුවේ අධි චෝදනා ලබා දැනට රිමාන්ඩ් බාරයේ පසු වන්නේ එල්ටීටීඊ සංවිධානයේ ගුවන්  බළගනයේ හිටපු ප‍්‍රබල සාමාජිකයින් දෙදෙනකු වන  යාපනය, සංකානෙයි හි පී.අරවින්දන් සහ කොටි සංවිධානයේ ගුවන් බළගනයේ හිටපු නායකයෙකු  වන රාසවල්ලන් තබෝ රූබන් (ගුවන් කදවුරු ප‍්‍රාහාරයේ ප‍්‍රධාන විත්තිකරු) යන විත්තිකරුවන් දෙදෙනායි.