(අංජුල මහික වීරරත්න)

E8 වීසා ක්‍රමය යටතේ දකුණු කොරියාවට ශ්‍රමිකයන් යැවීම පිළිබඳව තවදුරටත් අධ්‍යයනය කර ඊට අදාළ නීතිමය තත්ත්ව සොයා බලා ඉදිරියේදී අවශ්‍ය පියවර ගැනීමට විදේශ කටයුතු, විදේශ රැකියා හා සංචාරක අමාත්‍ය විජිත හේරත් මහතා  තීරණය කොට ඇතැයි විදේශ සේවා නියුක්ති කාර්යාංශය පවසයි.

යම් යම් පාර්ශව මැදිහත් වී දකුණු කොරියාවේ ඍතුමය රැකියා සඳහා වන E8 වීසා යටතේ අනුමත ක්‍රමවේදයෙන් බැහැරව කටයුතු කිරීම හේතුවෙන් එම රැකියා බලාපොරොත්තුවෙන් සිටින ශ්‍රමිකයින් අපහසුතාවයට පත්වීම පිළිබඳව අමාත්‍යවරයාගේ අවධානය යොමුවී තිබෙන බවද කාර්යාංශය කියයි.

බත්තරමුල්ලේ පිහිටි ශ්‍රී ලංකා විදේශ  සේවා නියුක්ති කාර්යාංශයට පැමිණි අමාත්‍යවරයාකාර්යාංශයේ ඉහළ නිලධාරීන් හා අදාල ශ්‍රමිකයින් පිරිසක් සමග මෙම ගැටලුව සම්බන්ධයෙන් විශේෂ සාකච්ඡාවක් පවත්වා අදාල තීරණයට එළඹ ඇත.

මෙම  සාකච්ඡාවට කාර්යාංශයේ සභාපති කෝශල වික්‍රමසිංහ‚ සාමාන්‍යාධිකාරී  ඩී.ඩී.පී සේනානායක මහත්වරු ඇතුළු නිලධාරීහු ද සහභාගී වූහ.