(උපුල් හේරත්)

අනුරාධපුර දැයට කිරුළ භූමියට වන අලින් රංචුපිටින් ගෙනත් දැමීමෙන් පසු ගොවින්ගේ බවබෝග මෙන්ම නිවාස වලට දැඩි ලෙස හානි කිරීම සම්බන්ධව බලධාරීන්ට හා දේශපාලනඥයන්ට එරෙහිව අද (30)  දහසකට අධික පිරිසක් එක්වී දැවැන්ත උද්ඝෝෂණයක නිරත වූහ.

අද උදෑසන 07.00 පමණ ආරම්භ කළ මෙම උද්ඝෝෂණයට ගොවි ගෙවිලියන් මෙන්ම කුඩා දරුවන්ද විශාල ප්‍රමාණයක් එක්ව සිටියහ.

ඇතැම් ගෙවිලියන් පෝස්ටර් ප්‍රදර්ශනය කරමින් , මහ විලච්චියට යන ප්‍රධාන මාර්ගය හා තන්තිරිමලේ දක්වා දිවෙන   ප්‍රධාන මාර්ගය අවහිර කරමින් කැලෑ අතු කොළ හා වන අලින් විසින් කඩා බිඳ දමා තිබූ පොල් ගස් ගෙනවිත් අවහිර කරනු ලැබීය.

මෙම උද්ඝෝෂණයට දහසකට අධික පිරිසක් රැස්ව සිටි අතර, පොලිස් බුද්ධි අංශ,නිල ඇඳුමින් සැරසුණු පොලිස් නිලධාරීන්,රාජ්‍ය නිලධාරීන් එහි රැඳී සිටියහ.

පැය දෙකකට  අධිකයක් මුළුල්ලේ මාර්ග ධාවනයට අවහිර ඇතිවිය.එය සංසුන් කිරීමට පොලිසිය දැරූ උත්සාහයන් බොහෝ සෙයින් අසාර්ථක විය.

තන්තිරිමලේ වැඩ බලන සහකාර පොලිස් අධිකාරී  ඩී.ප්‍රසන්න කුමාර මහතා හා ඔයා මඩුව පොලිස් ස්ථානාධිපතිවරයා වන පොලිස් පරීක්ෂක එචි.එමි.යු.සී.රත්නායක මහතා ඇතුළු නිලධාරීන් පිරිසක් මෙම උද්ඝෝෂණය සිදු කරන ස්ථානයේ රැඳීසිටියහ.

මෙම උද්ඝෝෂණය සඳහා ඔයාමඩුව,මහානිකවැව,නවෝදාගම,ආදී ගම්මාන විස්සකට නොඅඩු ජනතාවක් එක්ක සිටි අතර මේ  වනතුරුත් එම උද්ඝෝෂණය ක්‍රියාත්මක වෙමින් පවතී.