(දිලීප් ජයසේකර )


ඕස්ට්‍රේලියාවේ සහ එංගලන්තයේ පැවැත්වෙන සංගිත සංදර්ශණ දෙකක් සඳහා  විදෙස් ගත විමට අවසර දෙන ලෙස ඉල්ලා හෂිණි අමේන්ද්‍රා රත්නායක  අද (19) තංගල්ල මහාධිකරණයෙන් කළ ඉල්ලීම සළකා බැලූ තංගල්ල මහාධිකරණ විනිසුරු ආර්.එස්.එස්.සපුවිද මහතා සැකකාරිය රුපියල් ලක්ෂ දහයක බැදුම්කරයක් මත හා පුද්ගල ඇපයක් මත විදෙස් ගත විමට අවසර ලබා දුණි.


ඇය  2012 සිට 2016 දක්වා කාලය තුළ තංගල්ලේ පිහිටි රාජ්‍ය බැංකුවක සේවය කරමින් සිටින කාලය තුළදි එහි උකස් අංශයේ තිබු රුපියල් දොළොස් ලක්ෂ අසුදහසක් වටිනා  රන් භාණ්ඩ වංචාවක් සම්බන්ධයෙන් අත්අඩංගුවට ගෙන අධිකරණයට ඉදිරිපත් කිරිමෙන් පසු ඇප මත මුදා හැර තිබේ.සැකකරියගේ විදෙස් ගමන් තහනම් කර ඇයගේ විදෙස්ගමන් බලපත්‍රයද අධිකරණය බාරයට ගෙන තිබේ.


ප්‍රවීණ ගායකයකු වන ඇගේ  සැමියා  2018-10-17 සිට දින කිහිපයක් ඔස්ට්‍රේලියාවේ සහ එංගලන්තයේ සංගිත සංදර්ශන කිහිපයක් සදහා සහභාගි  වීමට නියමිත අතර වන අතර ඔහු සමඟ විදෙස් ගත විමට අවසර දෙන ලෙස ඉල්ලා බිරිද වන හෂිණි අමේන්ද්‍රා රත්නායක තංගල්ල මහාධිකරණයෙන් මෝසමක් මගින් ඉල්ලීමක් කළේය.


ඒ අනුව කරුණු සළකා බැලූ මහාධිකරණ විනිසුරු වරයා සැකකාරිය රුපියල් ලක්ෂ  දහයක බැදුම් කරයක් මත හා පුද්ගල අපයක් මත විදෙස් ගත විමට අවසර ලබා දුණි.පුද්ගල ඇපය තබන පුද්ගලයා සතු විදෙස් ගමන් බලපත්‍රයද මහාධිකරණය හමුවේ තැබිය යුතු වන අතර සැකකාරිය නැවත ලංකාවට පැමිණෙන තුරු ඇපකරුට විදෙස් ගත විමද තහනම් කෙරුණි.


ඊට අමතරව සැකකාරිය සදහා 2018-10-17 දින සිට 2018-11-10 දින දක්වා විදෙස් සංචාරයේ යෙදීමටත් ලංකාවට පැමිණ දින 07ක් ඇතුළත නැවත ඇයගේ විදෙස් ගමන් බලපත්‍රය තංගල්ල මහාධිකරණ රෙජිස්ට්‍රාර් වරයාට බාර දෙන ලෙසත් මහාධිකරණ විනිසුරු ආර්.එස්.එස්.සපුවිද මහතා නියෝග කෙරුණි.