තේ වගාව පත්ව ඇති තත්වයෙන් ගොඩගැනීමට වල්නාශකයක් අත්‍යවශ්‍ය වී ඇති බැවින් අපිට ග්ලයිෆොසේට් දෙන්න බැරි නම් වෙන දෙයක් හරි දෙන්න කියලා මම රතන හිමියන් ගෙන් ඉල්ලනවා යැයි වැවිලි කර්මාන්ත අමාත්‍ය නවීන් දිසානායක මහතා පැවසීය.

ප්‍රාදේශීය වැවිලි සමාගම්වල ගුණාත්මකභාවය ඉහළ නැංවීම සදහා වැවිලි සමාගම්වල උසස් නිලධාරීන් වෙනුවෙන් පැවති තේ කර්මාන්තයේ ප්‍රශස්ත කෘෂිකාර්මික ක්‍රම සැලසුම් පිළිබද වැඩමුළුවෙදී අමාත්‍යවරයා මේබව පැවසුවේය. 

එම වැඩමුළුවේදී ඇමතිවරයා මෙසේද පැවසීය.

ග්ලයිෆොසෙට් තහනම ගැනත් විවිධ ප්‍රකාශ පළ වෙනවා. මම එහෙම අභියෝගවලට බයත් නෑ. එහෙම අභියෝග ඉදිරිපත් කරන්නෙත් නෑ. ඒ කියන්නේ මගේ කරුණු සම්බන්ධයෙන් අභියෝග කළොත් ඒ ගැන මම ප්‍රතිචාර දක්වනවා. නමුත් මේ ග්ලයිෆොසේට් ප්‍රශ්නය වෙනස්. මම ඒකට ග්ලයිෆොසේට් කියන වචනය පාවිච්චි කරන්නත් කැමතියි නෑ. මම කැමතියි වල් නාශකය කියන වචනය පාවිච්චි කරන්න. 

වල් නාශකය අවශ්‍යයි. විශේෂයෙන්ම  වාණිජ කෘෂිකර්මයට. ඒ කියන්නේ ගෙවතු වගාවට වල් නාශකයක් අවශ්‍ය නෑ. නමුත් හෙක්ටයාර 1000 සිට 3000 දක්වා වගා කරන සමාගම් හෝ ආයතන වලට මේක ඕනෑ. විශේෂයෙන්ම අධික මිලක් තියෙනවා මනුස්ස ශ්‍රමයට. ඒ නිසා වල් නාශකයක් අවශ්‍යයි.

ග්ලයිෆොසේට් කියන වල් නාශකය මනුෂ්‍යයන්ට අහිතකරයි කියලා ලෝක සෞඛ්‍ය සංවිධානයෙන් කාසිජන් කියන වචනය පාවිච්චි කරලා තියෙනවා. මස් වර්ග හරක් මස් කාසිජන් තියෙනවා කියලා කියනවා. අපේ අසල්වැසි මිත්‍ර රටවල් වල ඉන්දියාව , ජපානය ඉතාමත් පරිසර හිතකාමී රටක්. නවසීලන්තය පරිසර හිතකාමී රටක්. ඒ අය මේ වල් නාශකය තහංචි කරලා නෑ. තාමත් පාවිච්චි කරනවා. ඉතිං අති බහුතර රටවල් ප්‍රමාණයක, රටවල් එකසිය අසූ ගාණක්ම, මේ වල් නාශකය  පාවිච්චි කරනවා. 

වල් නාශක ඉවත්කරන්න මම නෙවෙයි තීරණය කළේ. ජනාධිපතිතුමාගේ ප්‍රමුඛත්වයෙන් තිබෙන ජාතික ආර්ථික කමිටුව තීරණයක් අරගෙන තියෙනවා වල් නාශක තහංචිය ඉවත් කරන්න. ඒ අනුව මම ක්‍රියා කරනවා. 

රතන ස්වාමීන් වහන්සේ මෙයට එදත් විරුද්ධ වුණා. අදත් විරුද්ධ වෙනවා. උන් වහන්සේට ඒ අයිතිය තියෙනවා විරුද්ධ වෙන්න. නමුත් අපිටත් අයිතියක් තියෙනවා අපේ අදහස් ප්‍රකාශ කරන්න. “ යයිද නවීන් දිසානායක මහතා පැවසීය. 

- 044