2022 ජනවාරි මස 20 වන බ්රහස්පතින්දා
(විනීතා එම් ගමගේ)
රජයට අවශ්‍ය මුදල් සොයා ගැනීම සඳහා බැඳුම්කර වෙන්දේසිය නව ක‍්‍රමයකට සිදු කිරීමට රජය තීරණය කර ඇත.
ඒ අනුව ඍජු දීමනා හෝ පෞද්ගලිකව බැඳුම්කර නිකුත් කිරීමක් සිදු නොවන බවත් බැඳුම්කර නිකුත් කෙරෙන්නේ වෙන්දේසි ක‍්‍රමයට පමණක් බවත් ජාතික ප‍්‍රතිපත්ති හා ආර්ථික කටයුතු නියෝජ්‍ය අමාත්‍ය ආචාර්ය හර්ෂ ද සිල්වා මහතා ප‍්‍රකාශ කළේය.
නව ක‍්‍රමය අනුව සිදුවන පළමු බැඳුම්කර වෙන්දේසිය හෙට (27) සිදුවන බවද හෙතෙම පැවසීය.
දේශිය හා විදේශියව මේ සම්බන්ධ දැනුම ඇති ආචාර්ය, මහාචාර්යවරු, විදේශ උපදේශකයින් ඇතුළු පිරිස්වල උපදෙස් ලබාගෙන රජය මේ තීරණය ගත් බව ද නියෝජ්‍ය අමාත්‍යවරයා කීය.
ලබන වසරේ දී බැඳුම්කර වෙනුවෙන් රුපියල් බිලියන 957 ක් සෙවිය යුතුව ඇතැයි පැවසූ නියෝජ්‍ය අමාත්‍යවරයා 1990 ගණන්වල සිට ලබාගත් කල් පිරෙන බැඳුම්කර වෙනුවෙන් ගෙවීමට මෙම මුදල් අවශ්‍ය වනු ඇතැයි ද පැවැසීය.
නියෝජ්‍ය අමාත්‍යවරයා මේ අදහස් පළ කළේ රජයේ ප‍්‍රවෘත්ති දෙපාර්තමේන්තුවේ අද (26) පැවැති නව බැඳුම්කර නිකුතුව පිළිබඳව මාධ්‍ය දැනුවත් කිරීමේ මාධ්‍ය හමුව අමතමිනි.
