තරිඳු ජයවර්ධන

පොලිස්පතිවරයා විසින් දෙවැනි වරටත් වැඩ තහනම් කරනු ලැබූ කල්මුණේ පොලිස් අධිකාරී ප්‍රියදර්ශන හේරත් මහතා වහාම ක්‍රියාත්මක වන පරිදි යළිත් සේවයේ පිහිටුවීමට ජාතික පොලිස් කොමිෂන් සභාව තීරණය කළ බව එහි උසස් නිලධාරියෙක්  ලංකාදීපයට  පැවසීය.

සහකාර පොලිස් අධිකාරී සහ ඉන් ඉහළ නිලධාරීන්ගේ පරම විනය බලධාරියා වන්නේ ජාතික පොලිස් කොමිෂන් සභාව බවත්, පොලිස්පතිවරයා ප්‍රියදර්ශන හේරත් මහතාගේ වැඩ තහනම් කර ඇත්තේ කොමිසමේ ආවරණ අනුමැතියකින් පවා තොරව බවත්, එය සහ තවත් කරුණු සලකා බලා පොලිස් අධිකාරීවරයා යළි සේවයේ පිහිටුවීමට තීරණය කළ බවත් එම නිලධාරියා පැවසීය.

හේරත් මහතා නුගේගොඩ කොට්ඨාසයේ සේවය කරමින් සිටිය දී කළැයි කියන සිද්ධියක් සම්බන්ධයෙන් 2017 පෙබරවාරි මස 17 වැනි දා මුල් වරට වැඩ තහනම් කරනු ලැබීය. ඉන් පසු 2018 ජනවාරි මාසයේ දී ජාතික පොලිස් කොමිෂන් සභාවේ නියෝගයකට අනුව පසුගිය මැයි මාසයේ ඒ මහතා සේවයේ පිහිටවනු ලැබූ අතර ඉන් දින 20කට පසු යළිත් වරක් ඔහුගේ වැඩ තහනම් කළ බව පොලිසිය කියයි.

පොලිස් අධිකාරීවරයා 2009 වසරේ දී අනුරාධපුර වැඩබලන මූලස්ථාන පොලිස් පරීක්ෂකවරයකු ලෙස සේවය කරමින් සිටි සමයේ සිදුවීමක් සම්බන්ධයෙන් 2017 දෙසැම්බර් මාසයේ මහාධිකරණයේ නඩු පැවරීමේ සිද්ධියක් නිසා පොලිස්පතිවරයා දෙවැනි වර වැඩ තහනම සිදු කර ඇතැයි ද, ඊට අදාලව විමර්ශන අවසන් කර ඇත්තේ 2012 වසෙර්යැයි ද, එම චෝදනාවන්ට හේරත් මහතාට 2016 දී අවවාද පත්‍රයක් නිකුත් කර ඇතැයි ද උසස් නිලධාරියෙක් පැවසීය.

පොලිස් අධිකාරීවරයා නැවත සේවයේ පිහිටුවීමට කොමිසම ගත් තීරණය නීතිය හා සාමය අමාත්‍යංශ ලේකම්ටත්, පොලිස්පතිටත් දැනුම් දෙන බව ද කොමිසම කියයි.