(ඩයනා උදයංගනී)

දිස්ත‍්‍රික්ක කිහිපයකට දින දෙකක් පමණ තිස්සේ ඇද හැලූණු තද වැසි හේතුවෙන් කළු ගඟ සහ අත්තනගලූ ඔයේ ජල මට්ටම පිටාර මට්ටමට පැමිණ ඇතැයි ආපදා කළමනාකරණ මධ්‍යස්ථානය පවසයි.

කළු ගඟ මිල්ලකන්ද ප‍්‍රදේශයෙන් හා අත්තනගලූ ඔය දූනමලේ ප‍්‍රදේශයෙන් පිටාර මට්ටමට පැමිණ ඇති අතර ඒවායේ ජල මට්ටම තව දුරටත් ඉහළ යමින් පවතින නිසා ඒ ආසන්න ප‍්‍රදේශවල ජනතාව අවධානයෙන් සිටිය යුතු බව එම මධ්‍යස්ථානය නිකුත් කළ නිවේදනයක දැක්වේ.

මේ අතර කාලගුණ විද්‍යා දෙපාර්තමේන්තුව අද (03) නිකුත් කළ කාලගුණ විද්‍යා නිවේදනයේ දැක්වෙන්නේ බස්නාහිර, මධ්‍යම, දකුණ සහ සබරගමුව පළාත්වලට අද දිනය තුළ ගිගුරුම් සහිත තද වැසි බලාපොරොත්තු විය හැකි බවයි.

ඇතැම් ස්ථානයන්ට මිලිමීටර 100ට වැඩි තද වැසි ඇතිවිය හැකි බව ද එම නිවේදනයේ දැක්වේ.