2022 ජුනි මස 25 වන සෙනසුරාදා
( තිළිණි ද සිල්වා)
කොරෝනා වසංගත තත්ත්වය සම්බන්ධයෙන් සෞඛ්‍ය අමාත්‍යාංශය නිකුත් කර ඇති සියලුම සෞඛ්‍ය මාර්ගෝපදේශන වලට යටත්ව කොළඹ ජාත්‍යන්තර පොත් ප්‍රදර්ශනය ලබන ඉරිදා (27) තෙක් මහජනතාවට විවෘතව පවතින්නේ යැයි කොළඹ ජාත්‍යන්තර පොත් ප්‍රදර්ශනයේ සංවිධායක කමිටුවේ අධ්‍යක්ෂක සහ ශ්‍රී ලංකා පොත් ප්‍රකාශකයින්ගේ සංගමයේ හිටපු සභාපති විජිත යාපා මහතා ලංකාදීපයට අද (22) පැවසීය.
පොත් ප්‍රදර්ශනය නැරඹීමට පැමිණෙන සෑම අයෙකුම , එය පැවත්වෙන කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ ප්‍රධාන ගේට්ටුවේ සිට සමස්ත ප්‍රදර්ශන භූමිය පුරා සහ ප්‍රදර්ශන කුටි වලදී උෂ්ණත්ව පරීක්ෂාව , දෑත් සේදීම , අත් සේදුම්කාර දියර භාවිතා කිරීම අනිවාර්යෙන්ම මුඛ ආවරණ පැළඳීම , ආදී සෞඛ්‍යාරක්ෂිත ක්‍රමවේද පිළිපදිමින් එම ප්‍රදර්ශනය නැරඹීම සිදු කරන බවද විජිත යාපා මහතා වැඩිදුරටත් කියා සිටියේය.
ප්‍රදර්ශනය නැරඹීමට පැමිණෙන මහජනතාව එම සියලු සෞඛ්‍යාරක්ෂිත ක්‍රමවේද අනුගමනය කරමින් සිටින අතර , එම සෞඛ්‍ය උපදෙස් පිළිනොපැද සිටින අය වෙතොත් ඔවුන්ට අදාළ උපදෙස් දී ඒවා මෙහෙයවීමට සංවිධායක කමිටුව විසින් විශේෂ නිලධාරීන් පවා යොදවා තිබෙන බවද හෙතෙම කීය.
කොළඹ ජාත්‍යන්තර පොත් ප්‍රදර්ශනය ඇරඹීමට සති තුනකට පෙර සංවිධායක කමිටුව සෞඛ්‍ය අමාත්‍යාංශ බලධාරීන් හමුවී ඊට අදාළ සියලුම අවසරයන් ලබා ගත් බවද විජිත යාපා මහතා කීය.
රට තුළ පැවති කොරෝනා වසංගතය හමුවේ ජනතාවගේ මානසික සෞඛ්‍යයට හා රට යළි පණ ගැන්වීමේ වැඩපිළිවෙළට සහාය දීමක් වශයෙන් කිසිඳු ලාභයක් නොලබා මෙවර පොත් ප්‍රදර්ශනය සංවිධානය කිරීමට ශ්‍රී ලංකා පොත් ප්‍රකාශකයින්ගේ සංගමය ඇතුළු එහි සාමජිකයින් සියලුම දෙනා ඇපකැප වූ බවද ඒ මහතා වැඩිදුරටත් පෙන්වා දුන්නේය.
