(බිඟුන් මේනක ගමගේ) 

විකිරණශීලිතාව අධික කලාප දොළහක් මෙරටින් හඳුනාගෙන ඇතැයි භූ විද්‍යා සමීක්ෂණ හා පතල් කාර්යාංශය පවසයි.

ශ්‍රී ලංකාවේ විකිරණශීලී ඛනිජ පිළිබඳ මේ දිනවන සිදුකෙරෙන ගවේෂණයකදී මෙම හඳුනාගැනීම සිදුවිණි යැයි ද එයින් කලාප තුනක් මාතලෙන් ද නවයක් නැගෙනහිර වෙරළ තීරයෙන් ද වාර්තා වන්නේ යැයි ද එම කාර්යාංශයේ ජ්‍යෙෂ්ඨ අධ්‍යක්ෂ උදය ද සිල්වා මහතා ‘ලංකාදීප’යට පැවැසීය.

ජාත්‍යන්තර පරමාණුක බලශක්ති ඒජන්සිය මගින් පරිත්‍යාග කරන ලද ජංගම විකිරණමාන පද්ධතියක් හා එක්ස් කිරණ ප්‍රතිදීප්තතා වර්ණාවලීක්ෂනමානයක් උපයෝගී කෙරෙන මෙම ගවේෂණයට ශ්‍රී ලංකා පරමාණුක ශක්ති මණ්ඩලයේ සහයෝගය ලැබෙන්නේ යැයි ද ඒ මහතා කීවේය.

විකිරණශීලීතාවය සම්බන්ධව දිවයිනම ආවරණය වන පරිදි සිතියම් පිළියෙල කිරීම මෙමගින් සිදුවන්නේ යැයි කී හෙතෙම දඹුල්ල, පල්ලේගම, හඟුරන්කෙත යන ප්‍රදේශවල ඊට අදාළ සමීක්ෂණ කටයුතු අවසන් කර ඇතැයි සඳහන් කළේය.

විකිරණශීලී ඛනිජ පිළිබඳව මූලික අධ්‍යයනයක් මුලින්ම සිදුකර ඇත්තේ 19 වැනි සියවසේ මුල් කාලයේදී යැයි ද 1904 දී ආචාර්ය ආනන්ද කුමාරස්වාමි මහතා විසින් තෝරියනයිට් හා තෝරයිට් යන විකිරණශීලී ඛනිජ මෙරටින් සොයාගනු ලැබ ඇතැයි ද අධ්‍යක්ෂවරයා කීය.

ලෝකයේ ප්‍රථම වරට තෝරියනයිට් හා තෝරයිට් යන විකිරණශීලී ඛනිජ සොයාගෙන ඇත්තේ ශ්‍රී ලංකාවේ කරන ලද මෙම සමීක්ෂණයෙන් යැයි ද ඒවා භාවිතා කරගෙන ලොව ප්‍රකට විකිරණ විද්‍යාඥයන් පරීක්ෂණ රැසක්ම කර ඇතැයි ද සිල්වා මහතා කීවේය.

ඊට අමතරව මෙරටින් බහුලව හමුවන මොනසයිට් ඛනිජය සම්බන්ධයෙන් 1910 දී මූලික පරීක්ෂණ සිදුකර ඇතැයි ද පසුව බෙන්තොටට ආසන්න කයිකාවල ප්‍රදේශයේදී මොනසයිට් ඛනිජය නිස්සාරණය කිරීමේ නියමු කර්මාන්ත ශාලාවක් පිහිටුවිණි යැයි ද සිල්වා මහතා වැඩිදුරටත් සඳහන් කළේය.