භානුක අමරසිංහ

සම්පත් බැංකුව කොළඹ කොටස් හුවමාරුව තුළ සිදු කරන බැඳුම්කර නිකුතුවක් හරහා රුපියල් බිලියන 20 ක මුදලක් රැස් කරගැනීමට සූදානමින් සිටින බව පවසයි. ඒ සඳහා වන යෝජනාව වෙත බැංකුවේ අධ්‍යක්ෂ මණ්ඩලය විසින් පසුගිය 17 වැනිදා අනුමැතිය ලබාදී තිබේ. 

ඒ අනුව බාසෙල් III අනුකූල, අදියර 2, ලැයිස්තුගත, වර්ගකෙරුණු, සුරක්ෂිත නොවූ, උපප්‍රධාන, පිරිමුදවාගත හැකි ණයකරයක් /හෝ හරිත සහ / හෝ තිරසර බැඳුම්කරයක් ලෙස මෙය නිකුත් කිරීමට යෝජනා වී තිබෙන බව බැංකුව සඳහන් කරයි.

මෙහිදී උපරිමව ණයකර/හෝ හරිත සහ / හෝ තිරසර බැඳුම්කර කොටස් මිලියන 200ක් (200,000,‍000ක්) නිකුත් කිරීම සැලසුම වී ඇති අතර, එක් කොටසක් රුපියල් 100 බැගින් රැස් කෙරෙන සමස්ත වටිනාකම රුපියල් බිලියන 20 කි. එහිදී සියලු‍ම කොටස් හිමිකරුවන්ගේ සහ නියාමන ආයතනවල අනුමැතිය මේ සඳහා හිමිවිය යුතුව ඇති බවත්, වසර දෙකක කාලයක් තුළ සිදු කරන නිකුතු දෙකක් හරහා මෙම මුදල රැස් කරගන්නා බවත් බැංකුව පවසයි.