• නීතිය කඩ කළොත් රුපියල් මිලියන 25ක දඩයක් හෝ වසර තුනක සිරදඩුවමක්

ශ්‍රී ලංකාවේ නේවාසික පුද්ගලයන් විසින් මෙරට දී සිදු කරන ගනුදෙනු සඳහා ශ්‍රී ලංකා රුපියල් වෙනුවට විදේශ මුදල් භාවිත කිරීම තහනම් කර ඇතැයි ශ්‍රී ලංකා මහ බැංකුව නිවේදනයක් නිකුත් කරමින් සඳහන් කර සිටියි. 

ඒ අනුව 2017 අංක 12 දරන විදේශ විනිමය පනත යටතේ මහ බැංකුව විසින් විශේෂ අවසරයක් ලබා දී ඇති අවස්ථාවකදී හැර මෙරට නේවාසිකයන් අතර සිදුවන සියලු‍ම ගනුදෙනු ශ්‍රී ලංකා රුපියල්වලින් පමණක් සිදු කළ යුතු බව මහ බැංකුව එහිදී අවධාරණය කර සිටියි.

“එසේම ශ්‍රී ලංකා රුපියල් විදේශ මුදල්වලට පරිවර්තනය කරමින්, විද්‍යුත් මුදල් මාරු කිරීමේ කාඩ්පත් (හර හෝ බැර කාඩ්පත්) මගින් සිදු කරන ගෙවීම්ද ඇතුළුව, දේශීය ගනුදෙනුකරුවන්ගෙන් ලැබෙන ගෙවීම්, විදේශ විනිමය ගිණුමකට බැර කරවා ගැනීම සඳහා දේශීය වෙළෙඳුන්ට මහ බැංකුව කිසිදු අවසරයක් ලබා දී නොමැත.” යනුවෙන්ද එම නිවේදනයේ සඳහන් වෙයි.

ඒ අනුව මහ බැංකුවේ අවසරයකින් තොරව, ශ්‍රී ලංකාවේ නේවාසික පුද්ගලයකු මෙරට වෙළෙඳ ආයතනයක් වෙත විදේශ මුදලින් ගෙවීම් සිදු කිරිම හෝ ඕනෑම වෙළෙඳ ආයතනයක් භාණ්ඩ හා සේවා සැපයීම වෙනුවෙන් ශ්‍රීලංකාවේ නේවාසික පුද්ගලයකුගෙන් විදේශ මුදලින් ගෙවීම් ලබාගැනීම වරදක් වන බව මහ බැංකුව අවධාරණය කර සිටියි.

මෙම නීතිය උල්ලංඝණය කර නඩු විභාගයකින් පසු වැරදිකරුවන් වන පිරිස් රුපියල් මිලියන 25 කට නොවැඩි දඩයක් හෝ, වසර තුනකට නොවැඩි කාලයක් සඳහා (බරපතළ හෝ ලිහිල්) සිර දඩුවමක් හෝ එම දඩුවම් දෙකමද පැනවිය හැකි බව මහ බැංකුව වැඩිදුරටත් පවසයි.