දෙස් විදෙස් ඩිජිටල් ආර්ථික විශේෂඥයන් 25කට අධික පිරිසක් සමුළුව අමතති

භානුක අමරසිංහ

ඩිජිටල් තාක්ෂණ අමාත්‍යාංශය ශ්‍රී ලංකාවේ පළමුවරට සංවිධානය කරන ශ්‍රී ලංකා ෆින්ටෙක් සමුළුව 2025, අද කොළඹ බණ්ඩාරනායක ජාත්‍යන්තර සම්මන්ත්‍රණශාලා පරිශ්‍රයේදී ආරම්භ වෙයි. හෙට දිනය දක්වා පැවැත්වෙන සමුළුව ශ්‍රී ලංකාව ඩිජිටල් ආර්ථිකයක් කරා යන ගමනේ අවස්ථාවක් බව එම අමාත්‍යාංශය පවසයි. මෙම සමුළුවේදී රජයේ නියෝජිතයන්, මූල්‍ය ආයතන සහ ගෝලීය ෆින්ටෙක් සමාගම් ප්‍රධානීන් මෙන්ම එම කර්මාන්තයේ නවෝත්පාදකයන් ඇතුළු දේශකයන් 25 දෙනකුට අධික පිරිසක් සිය අදහස් දැක්වීම් සිදු කරන බවත් පවසයි.
මෙම සමුළුව සම්බන්ධයෙන් ලංකාදීප FT  වෙත අදහස් දැක්වූ ෆින්ටෙක් සංසදයේ සභාපති චන්න ද සිල්වා මහතා, “ඉන්දියාවේ, සිංගප්පූරුවේ ආර්ථික විශේෂඥයන් ඇතුළු තාක්ෂණවේදීන් පිරිසක් මෙන්ම මහ බැංකු අධිපතිවරයා ඇතුළු මෙරට මූල්‍ය ආයතන සහ තාක්ෂණික සමාගම්වල නියෝජිතයන් රැසක් මේ සඳහා සහභාගි වෙනවා. ඒ වගේම මෙම සමුළුවට සමගාමීව ආරම්භක සමාගම් (startups) සඳහා අවශ්‍ය අරමුදල් සපයා ගැනීමට අවස්ථාව ලබා දෙන Pitching Area  නමින් කොටසක් ක්‍රියාත්මක වෙනවා.“ යනුවෙන් පැවසුවේය. 
“මීට අමතරව රටෙහි මූල්‍ය අන්තර්ග්‍රහණය සඳහා ගත යුතු පියවර සහ එහිදී සිදු කළ යුතු නියාමන වෙනස්කම් මොනවාද යන්න පිළිබඳව සාකච්ඡා කෙරෙන වට මේස සාකච්ඡා 7ක් මෙම සමුළුවට සමගාමීව පැවැත්වෙනවා. ඒ හරහා ඉදිරිපත් වන වාර්තා 7ක් මගින් ඉදිරිපත් වෙන යෝජනා හරහා අනාගතයේ මෙරට ඩිජිටල් ආර්ථික කටයුතුවල සිදුවිය යුතු වෙනස්කම් පිළිබඳව අවධානය යොමු කරනවා.“ ඒ මහතා සඳහන් කළේය.