2025 සැප්තැම්බර් මස 03 වන බදාදා
2025 සැප්තැම්බර් මස 03 වන බදාදා
චාරුමිණි ද සිල්වා
පසුගිය වසරේ අගෝස්තු මාසයේදී මෙරටට පැමිණි ඕස්ට්‍රේලියාවේ බලශක්ති ක්ෂේත්‍රයේ දැවැන්තයකු වන යුනයිටඩ් පෙට්‍රෝලියම් සමාගම නිල වශයෙන් සම්පූර්ණයෙන් මෙරට හැර ගොස් ඇති බවත් ඒ බවට මීට මාස තුනකට පෙර දැනුම් දී තිබෙන බවත් ලංකා ඛනිජ තෙල් නීතිගත සංස්ථාවේ කළමනාකාර අධ්‍යක්ෂ ආචාර්ය මයුර නෙත්තිකුමාරගේ මහතා ඩේලි එෆ්ටී පුවත්පතට ප්‍රකාශ කළේය.
බලාපොරොත්තු වූ ලාබය ලබාගැනීමට හැකි වෙළෙඳපොළක් මෙරට නොමැති බවත් මෙහෙයුම් පවත්වාගෙන යාමට තිබෙන පරිසරය පිළිබඳව සෑහීමකට පත්විය නොහැකි බවත් යුනයිටඩ් පෙට්‍රෝලියම් සමාගම ලංකා ඛනිජ තෙල් නීතිගත සංස්ථාවට දැනුම්දී තිබෙන බවද ඔහු පැවැසුවේය.
යුනයිටඩ් පෙට්‍රෝලියම් සමාගම මෙරටින් සම්පූර්ණයෙන්ම පිටව ගොස් ඇති බැවින් එම සමාගම සමග ගිවිසුම් අත්සන් කළ මෙරට ඉන්ධනහල් 64 නැවතත් ලංකා ඛනිජ තෙල් නීතිගත සංස්ථාවේ කළමනාකාරීත්වය යටතට ගන්නා බවද ඔහු ප්‍රකාශ කළේය. යුනයිටඩ් පෙට්‍රෝලියම් සමාගම මෙරටින් ඉවත්වීම විශේෂයෙන් කැපී පෙනෙන්නේ එම සමාගම සිය ව්‍යාපාරය ව්‍යාප්ත කළ ප්‍රථම විදේශ රට ශ්‍රී ලංකාව වීම හේතුවෙනි.
ඛනිජ තෙල් නිෂ්පාදන ආනයනය, ගබඩා කිරීම සහ විකිණීම සඳහා ඇමෙරිකානු ඩොලර් මිලියන 27.5 ක ආයෝජනයක් පොරොන්දු වෙමින් යුනයිටඩ් පෙට්‍රෝලියම් සමාගම ආයෝජන මණ්ඩලය හරහා මෙරටට පැමිණියේය.
යුනයිටඩ් පෙට්‍රෝලියම් සම්පූර්ණයෙන් මෙරට හැර ගිහින්