2025 ජුලි මස 28 වන සඳුදා
විමුක්ති එස් රුද්‍රිගු
ඩිජිටල් ආර්ථිකයෙන් වසරකට ඇමෙරිකානු ඩොලර් බිලියන 1.6 ක විදේශ ආදායමක් මෙරටට ලැබෙන බවත් එම මුදල වර්ධනය කර ගැනීමට ශ්‍රී ලංකාවට හැකියාව පවතින බවත් ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා ඊයේ (18) ප්‍රකාශ කළේය.
ශ්‍රී ලංකාව 2016 වසරේ සිට ඩිජිටල් ආර්ථිකයෙන් ඇමෙරිකානු ඩොලර් බිලියන 5 විදේශ ආදායමක් උපයා ගැනීම පිළිබඳව කතා කරන බවත් 2030 වසර ඩිජිටල් ආර්ථිකය ඇමෙරිකානු ඩොලර් බිලියන 5 ක් දක්වා වර්ධනය කර ගැනීම රජයේ ඉලක්කය බවත් නියෝජ්‍ය අමාත්‍යවරයා පැවැසුවේය. ඊට හේතු ගණනාවක් තිබෙන බවද ඔහු ප්‍රකාශ කළේය.
නව ව්‍යවසායන්ට සුදුසු නිසි ව්‍යාපාර පරිසරයක් නොමැති වීම ඊට එක් ප්‍රධාන හේතුවක් බව වීරරත්න මහතා පැවැසුවේය. ඒ හේතුවෙන් මෙරටට නවෝත්පාදන සහ කුසලතා හෙබි පුද්ගලයන් රැසක් අහිමිවී තිබෙන බවත් නිෂ්පාදන සමාගම්වලට මෙරට රැඳී සිටීමට නොහැකිව විදේශ රටවලට පවා සංක්‍රමණය වී තිබෙන බවත් නියෝජ්‍ය අමාත්‍යවරයා ප්‍රකාශ කළේය.
”ඩිස්රප්ට් ඒෂියා 2025” වැනි වැඩසටහන් නව ව්‍යවසාය සඳහා අවශ්‍ය ව්‍යාපාරික වටපිටාව සහ ඇමෙරිකානු ඩොලර් බිලියන 5 ආදායම් ඉල්ලක්ක සපුරා ගැනීම සඳහා අවශ්‍ය රාමුව සකස් කරනු ඇතැයි රජයේ බලාපොරොත්තුව බවද ඔහු පැවැසුවේය. ශ්‍රී ලංකාව ඩිජිටල් කේන්ද්‍රස්ථානයක් ලෙස ඉමහත් ප්‍රසිද්ධියක් උසුලන බවත් ශ්‍රී ලංකාවෙන් පිටත තිබෙන සමාගම් සඳහා අති නවීන තාක්ෂණික විසඳුම් ලබාගෙන සමාගම් මෙරට ස්ථාපිතව තිබෙන බවත් වීරරත්න මහතා ප්‍රකාශ කළේය.
එලෙස අති නවීන තාක්ෂණික විසඳුම් ලබාදෙන සමාගම් මෙරට සිටියත් එම සමාගම් කටයුතු කරන්නේ පසුපෙළ සිට බවත් නියෝජ්‍ය අමාත්‍යවරයා පැවැසුවේය. ශ්‍රී ලංකාව මනස වෙනස්කර ගනිමින් නව උත්පාදන සහ නිෂ්පාදන පසුපස හඹායාම අවශ්‍ය බව වීරරත්න මහතා ප්‍රකාශ කළේය. මෙරට ස්ථාපිත කර ඇති නවෝත්පාදන සමාගම් ශ්‍රී ලංකාවේ රඳවා ගැනීමකින් තොරව ඉලක්කය කරා යා නොහැකි බවද ඔහු පැවැසුවේය.
‘‘ඩිස්රප්ට් ඒෂියා 2025” වැනි වැඩසටහන් ශ්‍රී ලංකාව නව ව්‍යවසාය සඳහා අවශ්‍ය ව්‍යාපාරික පරිසරය ආරම්භ කිරීමටත් තරුණයන්ට නව ව්‍යවසාය ආරම්භ කිරීමට සහාය වීමටත් උපකාරී වන බවද ඔහු ප්‍රකාශ කළේය. ‘‘ඩිස්රප්ට් ඒෂියා 2025” වැනි වැඩසටහන් මෙරටට ආයෝජන ඇදගැනීමට මෙන්ම පාසල, විශ්වවිද්‍යාලය සහ කර්මාන්ත ක්ෂේත්‍රය තුළ සිටින නවොත්පාදකයන්ට සහායක් වන බවද වීරරත්න මහතා පැවැසුවේය.
ඩිජිටල්කරණය සහ දුගීභාවය තුරන් කිරීම ඉදිරි වසර 5 සඳහා වන රජයේ න්‍යාය පත්‍රයේ ප්‍රධාන මාතෘකාවන් බවත් ඩිජිටල්කරණය ගැන කතා කිරීමේදී ඩිජිටල් කර්මාන්තය පිළිබඳව අනිවාර්යයෙන්ම කතාකළ යුතු බවත් ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා පැවැසුවේය. ජාතික ජන බලවේග රජය ඩිජිටල්කරණයට විශේෂ වැදගත්කමක් ලබා දෙන බවත් ඩිජිටල්කරණය යනු රාජ්‍ය සේවය ඩිජිටල්කරණය කිරීම පමණක් නොවන බවත් ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා ප්‍රකාශ කළේය.
‘‘ඩිස්රප්ට් ඒෂියා 2025” වැඩසටහන සම්බන්ධයෙන් මධ්‍යවේදීන් දැනුවත් කිරීම සඳහා කොළඹ සිනමන් ලයිෆ් හෝටලයේදී පැවැති මාධ්‍ය හමුවකදී ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා මෙම අදහස් පැවැසුවේය.
එහිදී අදහස් දක්වමින් කර්මාන්ත සහ ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ මහතා ප්‍රකාශ කර සිටියේ ශ්‍රී ලංකාව නව ව්‍යසායන්ට අවශ්‍ය ව්‍යාපාරික පරිසරයක් තිබුණත් එම පරිසරය හා නව ව්‍යවසාය එකිනෙකට සම්බන්ධවී නොමැති බවය. ඒ හේතුවෙන් නවෝත්පාදන සහ ව්‍යසායකයන්ට මග පෙන්වීම කර්මාන්ත සහ ව්‍යවසායකත්ව සංවර්ධන අමාත්‍යාංශයේ න්‍යාය පත්‍රයට ඇතුළත් වී තිබෙන බවද ඔහු පැවැසුවේය.
නව ව්‍යවසාය නංවන්න රජයෙන් ශක්තිමත් රාමුවක්