• රජය මෙන්ම පෞද්ගලික අංශයත් ඩිජිටල් පරිවර්තනයට සහාය දීම අවශ්‍යයි 

භානුක අමරසිංහ 

2026 අයවැය මගින් තොරතුරු තාක්ෂණය ඇතුළු ඩිජිටල් ආර්ථිකය වෙත වෙන් කර ඇති මුදල ප්‍රමාණවත් බවත්, විය යුත්තේ එම යෝජනා ක්‍රියාත්මකවීම බව WSO2 සමාගමේ නිර්මාතෘ සන්ජීව වීරවරණ මහතා පවසයි. 
 “මෙවර අයවැය හරහා රටේ තොරතුරු තාක්ෂණික හැකියාව තවදුරටත් වැඩිදියුණු කිරීමට වගේම ඩිජිටල් ආර්ථික අපේක්ෂා වෙත යෝජනා රැසක් ඉදිරිපත් වෙලා තිබෙනවා. ඒ සඳහා වෙන් කර ඇති මුදල් වුණත් ප්‍රමාණවත්. ඒත් විය යුත්තේ මේ යෝජනා ක්‍රියාත්මක වීමයි.” 
වි‍ශේෂයෙන්ම ඩිජිටල් ආර්ථිකය පිළිබඳ ජනාධිපති උපදේශක හාන්ස් විජේසූරිය මහතාගේ නායකත්වයෙන් මෙම කටයුතු හොඳින් සිදුවන බවත්, පෙර අවස්ථාවලදී මෙන් බාධා ඇති නොවී කටයුතු සිදුවීම වැදගත් බවත් ඒ මහතා පෙන්වා දෙයි. 
 “මමත් අවුරුදු 15ක් තිස්සේ පැවති රජයන් සමගින් මේ තොරතුරු තාක්ෂණය පිළිබඳව දායකත්වය ලබා දී තිබෙනවා. ඒත් විවිධ හේතු නිසා ඇතැම් ව්‍යාපෘති ක්‍රියාත්මක වුණේ නෑ. රජයට වුණත් මේ සඳහා සම්පූර්ණයෙන් දායකත්වය දෙන්න බැහැ. පෞද්ගලික අංශයත් මෙයට ඉදිරිපත් විය යුතුයි.” 

මෙවර අයවැයට අනුව 2026දී රජය විසින් ඩිජිටල් ආර්ථික සංවර්ධනය වෙත සිදු කරන රුපියල් මිලියන 25,500 කට අධික ආයෝජනයක් කිරීමට සූදානමින් සිටියි. 
එහිදී GovPay පද්ධතිය ප්‍රචලිත කිරිම, 5G දත්ත මධ්‍යස්ථාන පිහිටුවීම, ඩිජිටල් හැඳුනුම්පත් ව්‍යාපෘතිය, රජයේ ක්ලවුඩ් යටිතල පහසුකම් දියුණු කිරීම, තනි පියැසි ඩිජිටල් අතුරුමුහුණතක් සඳහා මෘදුකාංග නිර්මාණය, ඩිජිටල් ගනුදෙනු ව්‍යාප්ත කිරීම, QR ගෙවීම් කිරීම ප්‍රචලිත කිරීම, දත්ත මධ්‍යස්ථාන පිහිටුවීම සඳහා ආයෝජන ආකර්ෂණය, කෘත්‍රිම බුද්ධියේ කලාපීය ප්‍රමුඛයකු වීම, ආරම්භක සමාගම් සඳහා අරමුදලක් ස්ථාපිත කිරිම යනාදිය මෙම යෝජනා අතර පවතී. 
මේ අතර රජය මෙවර අයවැය හරහා ඉදිරිපත් කර තිබෙන තොරතුරු තාක්ෂණික උද්‍යාන ස්ථාපිත කිරීම පිළිබඳ අදහස ප්‍රතික්ෂේප කරන වීරවරණ මහතා එය යල් පැනගිය සංකල්පයක් බව පවසා සිටියි.