2025 ජුලි මස 08 වන අඟහරුවාදා
2025 ජුලි මස 08 වන අඟහරුවාදා
විමුක්ති එස් රුද්‍රිගු
ඇමෙරිකානු ජනාධිපති ඩොනල්ඩ් ට්‍රම්ප්ගේ ”අන්‍යෝන්‍ය බද්ද” අත්හිටුවු කාලය අනිද්දා (09) අලු‍යම 12.01ට අවසන් වීමට නියමිත අතර, ඊට පෙර මෙරටට පැනවූ සියයට 44 ක තීරු බද්ද අඩුකළ බව දන්වමින් ජනපති ට්‍රම්ප්ගේ අත්සනින් යුත් ලිපියක් මෙරටට ලැබෙනු ඇතැයි අපේක්ෂා කරන බව මුදල් අමාත්‍යාංශ ආරංචිමාර්ග ප්‍රකාශ කළේය.
‘‘අන්‍යෝන්‍ය බදු” ක්‍රමය යටතේ ශ්‍රී ලංකාවට පැනවූ සියයට 44 ක තීරු බද්ද අඩුකර ගැනීමට මෙරට බලධාරීන් ඇමෙරිකා වෙළෙඳ නියෝජිත කාර්යාලය සමග සාකච්ඡා වට දෙකක් පැවැත්වූ අතර, අවසන් වටය පසුගිය මැයි 26 වැනිදා ඇමෙරිකාවේ වොෂිංටන් නුවරදී පැවැත්වුණේය. එවකට මුදල් හා ආර්ථික ස්ථායිකරණ නියෝජ්‍ය අමාත්‍ය හර්ෂණ සූරියප්පෙරුම මහතාගේ ප්‍රධානත්වයෙන් එම සාකච්ඡා පැවැත්විණි.
රටවල් 12 ක් සඳහා ඇමෙරිකාවට අපනයනය කරන භාණ්ඩවලට අවසාන වශයෙන් පනුවනු ලබන ‘‘අන්‍යෝන්‍ය බදු” ප්‍රතිශත ඇතුළත් ලිපිවලට තමන් අත්සන් තැබූ බවත්, එම ලිපි අද (07) රටවල්වලට ලැබීමට සලස්වන බවත් ඇමෙරිකානු ජනාධිපති ඩොනල්ඩ් ට්‍රම්ප් පසුගියදා ප්‍රකාශ කළේය. ලිපි මගින් පනවා ඇති නව බදු ප්‍රතිශත පිළිගැනීම හැර වෙන විකල්පයක් එම රටවලට නොමැති බවත් ට්‍රම්ප් පැවැසුවේය.
පසුගිය අප්‍රේල් 2 වැනිදා ජනපති ට්‍රම්ප් ‘‘අන්‍යෝන්‍ය බදු” ක්‍රමය ප්‍රකාශයට පත්කළ අතර, එය පසුගිය අප්‍රේල් 9 වැනිදා සිට ක්‍රියාත්මක වීමට නියමිතව තිබිණි. එහිදී ඇමෙරිකාවේ වෙළෙඳ හවුල්කරුවන්ට එම රටවලදී ඇමෙරිකානු භාණ්ඩවලට පනවන බදු ප්‍රතිශතය මත පදනම්ව බදු පනවනු ලැබුවේය. කෙසේ නමුත් පසුගිය අප්‍රේල් 9 වැනිදා ‘‘අන්‍යෝන්‍ය බදු” ක්‍රමය ක්‍රියාත්මක කිරීම දින 90 ක කාලයක් සඳහා අත්හිටුවීමට ට්‍රම්ප් පරිපාලනය කටයුතු කළේය.
එහිදී තම රටට පැනවූ බදු ප්‍රතිශත අඩුකර ගැනීම සඳහා බොහෝ රටවල් සාකච්ඡා මේසයට පැමිණි අතර, ඒ සඳහා ප්‍රථමයෙන් පැමිණි රටවල්වලට ශ්‍රී ලංකාවද අයත් විය.
“ට්‍රම්ප් තීරු බද්ද” අඩුකළ බව දන්වන ලිපියක් මෙරටට ලැබෙතැයි අපේක්ෂාවක්