ව්‍යාපාරික ක්‍රියාකාරකම් ඉහළ යාම මධ්‍යයේ මෙරට ආර්ථිකය පිළිබඳ ව්‍යාපාරික ප්‍රජාව තුළ තිබෙන ශුහවාදී බව, මාස හයකින් වාර්තා වූ ඉහළම අගය පසුගිය මාර්තු මාසයේදී වාර්තා කර ඇතැයි එල්.එම්.ඩී ව්‍යාපාරික සඟරාව පවසයි.

මෙරට ව්‍යාපාරිකයන් රටේ ආර්ථික දැක්ම පිළිබඳව දරණ මතයේ සැලකිය යුතු වෙනසක් දක්නට ඇති බවත් එය පෙපර් කියුබ් ව්‍යාපාර විශ්වාසනීය දර්ශකය මාස හයකින් වාර්තා කළ ඉහළම අගය මාර්තු මාසයේදී වාර්තා කිරීමට හේතුවක් වී ඇති බවත් පෙපර්කියුබ් උපදේශකයන් පැවැසුවේය. සිය විකුණුම් පරිමාව සැලකිය යුතු මට්ටමකින් ඉහළ යනු ඇති බව මෙන්ම ආර්ථික ක්‍රියාකාරකම් ඉහළ යනු ඇති බවට මෙරට ව්‍යාපරික ප්‍රජාව කර ඇති පුරෝකථන ඉන් පිළිබිඹු වන බව පෙපර්කියුබ් උපදේශකයන් ප්‍රකාශ කළේය.

එල්.එම්.ඩී යනු මෙරට ප්‍රමුඛ පෙළේ ව්‍යාපාරික සඟරාවක් වන අතර එහි ප්‍රකාශකයකු අදහස් දක්වමින් ප්‍රකාශ කර සිටියේ මෙරට සමාගම් විශාල ප්‍රමාණයක් ව්‍යාපාර සඳහා ධනාත්මක, වර්ධනයට නැඹුරු ප්‍රවේශයක් පවත්වා ගෙනයන බවයි. එසේම පෙපර්කියුබ් උපදේශකයන් ප්‍රකාශ කර සිටියේ රටේ ආර්ථිකය පිළිබඳව ව්‍යාපාරික ප්‍රජාව දරණ ශුභවාදී මතය මෙරට ආර්ථිකයට තිබෙන ඔරොත්තු දීමේ හැකියාව තවත් ශක්තිමත් කරන බවයි. පසුගිය මාර්තු මුල් සතියේදී පෙපර් කියුබ් ව්‍යාපාර විශ්වාසනීය දර්ශක සමීක්ෂණයට සහභාගී වූ පුද්ගලයන්ගෙන් සියයට 73 ක් ඉදිරි මාස 12 තුළ මෙරට ආර්ථිකය තවත් යහපත් අතට හැරෙනු ඇතැයි විශ්වාසය පළකළ බව එල්.එම්.ඩී ව්‍යාපාරික සඟරාව ප්‍රකාශ කළේය. පසුගිය පෙබරවාරි මාසය සමග සංසන්දනය කරන විට එය සියයට 9 ක සතුටුදායක ඉහළ යාමක් බවද එල්.එම්.ඩී සඟරාව පැවැසුවේය.

සමීක්ෂණයට සහභාගී වූ අලෙවිකරණ විධායක නිලධාරීන්ගෙන් සියයට 84 ක් මීළඟ මාස 12 තුළදී ඔවුන්ගේ විකුණුම් පරිමාවේ වැඩිවීමක් අපේක්ෂා කරන බව ප්‍රකාශ කළේ යැයි එල්.එම්.ඩී සඟරාව සඳහන් කළේය. මෙය පෙබරවාරි මාසය සමග සංසන්දනය කර විට සියයට 6 ක පහළ යාමකි.