මෙරට මානව සම්පත් කළමනාකරණ ක්ෂේත්‍රයේ ප්‍රමුඛතමයා වන ශ්‍රී ලංකා වරලත් පිරිස් කළමනාකරණ ආයතනයෙහි (CIPM Sri Lanka) සභාපතිවරයා ලෙසට ප්‍රවීණ මානව සම්පත් වෘත්තිකයකු, ව්‍යාපාර ක්ෂේත්‍රයේ ප්‍රමුඛයකු හා විද්වතෙකු වන ආචාර්ය නීල් බෝගහලන්ද මහතා නව ධූර කාලයක් සඳහා පත්ව සිටී. ජුලි 18 වැනිදා කොළඹ ගලදාරි හෝටලයේ පැවති ආයතනයේ වාර්ෂික මහා සභා රැස්වීමේදී ඔහුගේ පත්වීම ස්ථීර කෙරිණ.

ඔහුගෙන් ආයතනයට ලැබී තිබෙන විශිෂ්ට සේවාව මෙන්ම මානව හිමිකම් ක්ෂේත්‍රයට ඔහු ලබා දී ඇති සුවිශේෂී දායකත්වය ද සැලකිල්ලට ගත් ආයතනයේ විධායක සභාව එම ධූරය භාරගන්නා මෙන් බෝගහලන්ද මහතාගෙන් ඉල්ලා සිටියේය. 2006 වසරේ සිට විධායක සභාවේ විවිධ නායකත්ව භූමිකා දරා ඇති ඔහු දශක දෙකකට ආසන්න ආයතනික දැනුමකට, උපායමාර්ගික නායකත්වයකට හා වෘත්තීය ප්‍රවණත්වයකට හිමිකම් කියයි.

මහනුවර ශාන්ත අන්තෝනි විද්‍යාලයෙහි කීර්තිමත් ආදිශිෂ්‍යයකු වන ඔහු, වැවිලි ක්ෂේත්‍රයෙන් තම වෘත්තීය ආරම්භ කර 2000 වසරේදී මානව හිමිකම් කළමනාකරණයට පිවිසියේය. බ්‍රවුන්ස් සමූහය, සම්පත් බැංකුව, සහ රෝයල් සෙරමික් ලංකා යන ආයතනවල මානව හිමිකම් වගකීම්වලට නායකත්වය ලබාදී ඇති බෝගහලන්ද මහතා වසර 15කට අධික කාලයක් ලැයිස්තුගත හා ලැයිස්තුගත නොවන සමාගම්වල ප්‍රධාන අධ්‍යක්ෂ මණ්ඩල ධූරය ද, උසස් ධූර පිළිබඳ පාර්ලිමේන්තු කමිටුවේ අනුමැතියෙන් රාජ්‍ය ව්‍යවසාය දෙකක සභාපතිත්වය ද දරා ඇත.

කළමනාකරණය පිළිබඳ ආචාර්ය උපාධියකට හිමිකම් කියන ඔහු වරලත් කළමනාකරණ ගණකාධිකාරීවරයකු (ඕස්ට්‍රේලියාව) වන අතර, මානව විශ්ලේෂණය හා දත්ත විද්‍යාව පිළිබඳව ඉහළ මට්ටමේ පාඨමාලාවක් එක්සත් රාජධානියේ පිහිටි කීර්තිමත් කේම්බ්‍රිජ් විශ්වවිද්‍යාලයේදී හදාරා තිබේ. හසළ පර්‌යේෂකයකු ලෙසින් ඔහුගේ පර්‌යේෂණ පත්‍රිකා ජාත්‍යන්තර වශයෙන් පළව තිබෙන අතර, ඔහු ශ්‍රී ලංකා ජාතික විද්‍යා පදනමේ විද්වත් මණ්ඩල සාමාජිකයකු ද වන්නේය.