සභාපති ශ්‍රියාන් කුරේ සහ ප්‍රධාන විධායක නිලධාරි කැලුම් එදිරිසිංහ

• සාමාන්‍යකරණය කළ පදනම මත බදු පසු ලාබය (PAT) දෙගුණයක් කරයි
• බදු පසු ලාබය ඉතිහාසයේ ඉහළම අගය වන රු. බිලියන 11 දක්වා වර්ධනය විය
• ශුද්ධ ණය සහ තැන්පතු, සාමාන්‍යකරණය කළ පදනමක් මත පිළිවෙළින් සියයට 26.7 සහ සියයට 10.4 කින් වර්ධනය වෙලා

NDB PLC 2025 දෙසැම්බර් 31 දිනෙන් අවසන් වූ මුල්‍ය වර්ෂයට අදාළ ප්‍රතිඵල කොළඹ කොටස් හුවමාරුව වෙත නිකුත් කරන ලදී. බැංකුව විසින් ඉදිරිපත් කළ පූර්ණ වර්ෂ ප්‍රතිඵල අනුව, සියලු‍ ව්‍යාපාරික ක්ෂේත්‍රවල ශක්තිමත් වර්ධනයක් පෙන්නුම් කරන අතර, සමාන පදනමක් මත ශුද්ධ බැංකු ආදායම සියයට 45.2 කින් වැඩි වී ඇත.
අනෙකුත් බැංකු මෙන්ම, ISB ණය ප්‍රතිව්‍යුහගත කිරීම සාර්ථකව අවසන් වීමෙන් පසුව, 2024 මුල්‍ය වර්ෂයේ බැංකුවේ මුල්‍ය කාර්ය සාධනයට ධනාත්මක බලපෑමක් ඇති විය. එම වසර සඳහා, පොලී ආදායම, ගාස්තු ආදායම සහ ශුද්ධ ණය හානිකරණ අලාභය පිළිවෙළින් රුපියල් බිලියන 1.4ක්, රුපියල් බිලියන 0.7ක් සහ රුපියල් බිලියන 9.4ක් ලෙස එක් වරක් පමණක් ඇති වූ බලපෑමක් ලෙස වාර්තා විය.
බැංකුවේ සමස්ත ආදායමේ සම්භාවිතාව සියයට 75.0 කට ආසන්න ප්‍රමාණයක් නියෝජනය කරන ශුද්ධ පොලී ආදායම , සාමාන්‍යකරණය කළ පදනමක් මත සියයට 6.5 කින් වර්ධනය විය. වත්මන් අඩු පොලී අනුපාත පසුබිම හේතුවෙන්, පොලී උපයන වත්කම් මත පීඩනයක් පැවතියද, බැංකුවේ නියමිත සහ ක්‍රමානුකූල ආන්තර කළමනාකරණය හේතුවෙන් ශුද්ධ පොලී ආන්තරය වසර සඳහා සියයට 4.0 ලෙස ස්ථාවර කරගැනීමට හැකි විය.
සැසඳිය හැකි පදනමක් මත, එක්වරක් පමණක් සිදු වූ අයිතම ඉවත් කළ විට, NIM සියයට 4.2 ලෙස වාර්තා වී ඇති අතර, එය 2024 වසරේ සියයට 4.3 සහ සියයට 4.5 සමඟ සසඳන විට ස්ථාවර මට්ටමක් පෙන්වයි.

 වසර අවසානය වන විට, බැංකුවට විශේෂ ගිවිසුමක් යටතේ ගනුදෙනුකරුවන් සමග පවත්වා තිබූ ණය සහ තැන්පතු මුළු වටිනාකම රු. බිලියන 29.3 ක් විය (2024 අවසානයේ: රු බිලියන 19.6).
වසර සඳහා ශුද්ධ ගාස්තු සහ කොමිස් ආදායම රු. බිලියන 8.1 දක්වා ළඟා වූ අතර, 2024 වසරේ රු. බිලියන 7.1 (අන්තර්ජාතික ස්වෛරීය බැඳුම්කර (ISB) ප්‍රතිසංවිධානයට අදාළ ගාස්තු ඉවත් කර) සමඟ සසඳන විට සියයට 14.3 ක වර්ධනයක් නිරූපණය කරයි.
මෙම වසරේ ප්‍රධාන වශයෙන් වර්ධනයට දායක වූ බැංකු සේවා ලෙස වාණිජ බැංකු සේවා, ණය හා ණය පහසුකම්, ඩිජිටල් බැංකු සේවා, සහ ක්‍රෙඩිට් හා ඩෙබිට් කාඩ්පත් අංශ හඳුනාගත හැක.
2025 වසර සඳහා ණය හානිකරණ අලාභය රු බිලියන 5.7 වූ අතර, 2024 වසරේ රු. බිලියන 13.2 සමඟ සසඳන විට සියයට 57.2 ක සැලකිය යුතු අඩුවක් පෙන්නුම් කරයි. මෙය බැංකුවේ ශක්තිමත් ණය ඇගයීම් ක්‍රියාපටිපාටි සහ ණය එකතු කිරීම සහ ප්‍රතිසාධන කටයුතු පිළිබඳ අවධානය යොමු කළ ප්‍රයත්නයන්ගේ ප්‍රතිඵලයකි.
මෙම සාර්ථකත්වය වඩාත් පැහැදිලිව පෙන්වන්නේ 2025 අවසානයේ දෙවැනි අදියර සහ තෙවැනි අදියර ණය අනුපාත පිළිවෙළින් සියයට 7.9 සහ සියයට 10.8 දක්වා යහපත් වීමෙන්ය. 2024 වසර අවසානයේ එය සියයට 16.6 සහ සියයට 14.0 ලෙස වාර්තා වී තිබුණි.
තවද, තෙවන අදියර ණය වෙන්කිරීම් ආවරණ අනුපාතය 2024 වසරේ සියයට 54.5 සිට සියයට 59.1 දක්වා වැඩිවී ඇති අතර, බැංකුවේ වගකීම් සහිත ණය අවදානම් කළමනාකරණය මෙයින් තහවුරු වේ.
2025 වසර සඳහා මෙහෙයුම් වියදම් රු. බිලියන 19 ලෙස අවසන් වූ අතර, එය ගිය වසරට සාපේක්ෂව (YoY) සියයට 13.1 ක වැඩිවීමක් පෙන්නුම් කරයි. මෙම වැඩිවීම ප්‍රධාන වශයෙන් කාර්යය මණ්ඩලයට අදාළ සාමාන්‍ය වැටුප් වර්ධනයන් සහ වෙළෙඳපොළ සමානීකරණයන්, තොරතුරු තාක්ෂණ යටිතල පහසුකම් සහ ව්‍යාපාර සංවර්ධනය සඳහා වසර තුළ සිදු කළ වැඩි ආයෝජන හේතුවෙන් සිදු විය.
කොටස් හිමිකම් මත ප්‍රතිලාභ අනුපාතය (ROE) 2025 වසර සඳහා සියයට 13.5ක් ලෙස වාර්තා වී ඇති අතර, 2024 වසරේ එම පදනම මත සියයට 12.2 සහ අන්තර්ජාතික ස්වෛරීය බැඳුම්කර ණය ප්‍රතිසංවිධානයෙන් ලැබූ එක්වරක් පමණක් වූ ආදායම ඉවත් කළ විට සියයට 7.7 සමඟ සසඳන විට සැලකිය යුතු වර්ධනයක් පෙන්නුම් කරයි.
2025 වසරේ දෙවැනි අර්ධය පමණක් සලකා බැලූ විට, කොටස් හිමිකම් මත ප්‍රතිලාභ අනුපාතය සියයට 16.4 කට ආසන්න මට්ටමකට ළඟා වී ඇති අතර, වසරේ පළමු අර්ධය සමඟ සසඳන විට ශක්තිමත් වර්ධනයක් පෙන්නුම් කරයි.
එසේම, බැංකුවේ වත්කම් මත ප්‍රතිලාභ අනුපාතය (ROA, බදු පෙර) සම්පූර්ණ වසර සඳහා සියයට 2.5ක් ලෙස සහ 2025 දෙවැනි අර්ධය සඳහා සියයට 2.8 ලෙස වාර්තා විය. 2024 වසරේදී, ISB එක්වරක් පමණක් ලැබූ ලාබ ඇතුළත් හා ඉවත් කළ පදනම මත ROA පිළිවෙළින් සියයට 3.1 සහ සියයට 1.5ක් විය.
2025 සම්පූර්ණ වසර සඳහා කොටසකට ලැබූ ලාභය (EPS) රු. 25.90 ලෙස වාර්තා වී ඇති අතර, 2024 වසරේ එම පදනම මත රු. 21.25 හා ISB බලපෑම ඉවත් කළ විට රු. 13.30 සමඟ සසඳන විට එහි වර්ධනයක් පෙන්නුම් කරයි. සමූහ මට්ටමේ එම අනුපාතය සියයට 27.8 ලෙස වාර්තා වී ඇත. 
2025 වසර අවසානය වන විට, බැංකුවේ මුළු තැන්පතු රු. බිලියන 707.2 දක්වා ඉහළ ගොස් ඇති අතර, එය 2024 අවසානයේ රු. 631.7 බිලියන සමඟ සසඳන විට සියයට 11.9 ක වර්ධනයක් නිරූපණය කරයි.
එමෙන්ම, ශුද්ධ ණය රු. බිලියන 593.6 දක්වා වර්ධනය වී ඇති අතර, පසුගිය වසරේ රු. බිලියන 460.7 සමඟ සසඳන විට 28.8 ක වර්ධනයක් වාර්තා කරයි.
තවද, එක්වරක් පමණක් සිදු වූ සහ විශේෂ ස්වභාවයේ ගනුදෙනු ඉවත් කළ විට, 2024 වසර අවසානයට සාපේක්ෂව සාමාන්‍යකරණය කළ ශුද්ධ වර්ධනය පිළිවෙළින් සියයට 26.7 සහ සියයට 10.4 ලෙස වාර්තා වේ.
බැංකුවේ ජංගම සහ ඉතිරි කිරීමේ තැන්පතු අනුපාතය CASA අනුපාතය (අඩු වියදම් තැන්පතු අනුපාතය) සාමාන්‍යකරණය කළ පදනමක් මත 2025 වසර අවසානයේ සියයට 23.9 ලෙස වාර්තා වී ඇති අතර, 2024 වසර අවසානයේ සියයට 22.5 සමඟ සසඳන විට වර්ධනයක් පෙන්නුම් කරයි. මෙය අඩු වියදම් මුල්‍ය සම්පාදනය වැඩිදියුණු කිරීම සඳහා බැංකුව ගෙන යන අඛණ්ඩ උත්සාහය සමග සමානුපාත වේ.