විදේශ රැකියා සඳහා යොමුවන ශ්‍රී ලාංකිකයන් උදෙසා මූල්‍ය සහාය ලබාදීමේ යාන්ත්‍රණයක් ශක්තිමත් කරලීමේ කැපී පෙනෙන ඉදිරි පියවරක් සනිටුහන් කරමින් LOLC ෆිනෑන්ස් පීඑල්සී පසුගිය ජනවාරි 7 වැනිදා, ශ්‍රී ලංකා අපනයන ණය රක්ෂණ සංස්ථාව (SLECIC) සමග උපායමාර්ගික හවුල්කාරීත්වයකට එළැඹුණි.

මෙම සහයෝගීතාව යටතේ ශ්‍රී ලංකා අපනයන ණය රක්ෂණ සංස්ථාව (SLECIC) එහි ‘ඇපාරා’ යෝජනා ක්‍රමය යටතේ තහවුරු කරන ලද රැකියා අවස්ථාවල මූලික වියදම් ආවරණය කෙරෙන ණය රක්ෂණ සහතිකයක් LOLC ෆිනෑන්ස් පීඑල්සී හි කුඩා හා මධ්‍ය පරිමාණ ව්‍යාපාර සහ පෞද්ගලික මූල්‍ය අංශය හරහා ලබා දෙනු ඇත.

ගුවන් ගමන් ගාස්තු, ශ්‍රී ලංකා විදේශ සේවා නියුක්ති කාර්යාංශයට ගෙවිය යුතු ලියාපදිංචි ගාස්තු, වීසා ගාස්තු, නැව් නැගීමේ ගාස්තු, වෛද්‍ය පරීක්ෂණ සහ අනෙකුත් සංක්‍රමණ ආශ්‍රිත වියදම් ඇතුළුව විදෙස්ගත වීමට පෙර දැරිය යුතු අත්‍යවශ්‍ය වියදම් සපුරාලමින් විදේශ රැකියා සඳහා යන සංක්‍රමණික සේවකයන්ට සහාය වීමට මෙම පහසුකම නිර්මාණය කර තිබේ.

මෙම හවුල්කාරීත්වයෙන් විදේශ රැකියා සොයන බොහෝ ශ්‍රී ලාංකිකයන් මුහුණ දෙන තීරණාත්මක මූල්‍යමය බාධාවලට ඍජුව විසඳුම් සපයමින් ඔවුන්ට විධිමත් සැලසුම්ගත මූල්‍යකරණයකට ප්‍රවේශය සපයයි. එමගින් ඔවුන් අවිධිමත් ණය දෙන්නන් මත යැපීම අඩු කරන අතර, විදේශ රැකියා සඳහා සූදානම් වීමත් සමග පැනනගින මූල්‍ය ගැටලු‍ අවම කිරීමටද එය උපකාර වේ. ඒ අනුව මේ මුලපිරීම සංක්‍රමික සේවකයන් සහ ඔවුන්ගේ පවුල්වල මූල්‍ය ආරක්ෂාව වැඩිදියුණු කරමින් ආරක්ෂිත සංක්‍රමණය ප්‍රවර්ධනය කිරීමට වැදගත් කාර්යභාරයක් ඉටු කරනු ඇතැයි අපේක්ෂා කෙරේ. මූල්‍ය සේවා සියලු‍ ගනුදෙනුකරුවන් වෙත අඛණ්ඩව ලබාදීම, ආරක්ෂිත විදේශ රැකියා ප්‍රවර්ධනය සහ ශ්‍රී ලංකාවේ ආර්ථිකයට අර්ථවත් ලෙස දායක වීම සඳහා LOLC ෆිනෑන්ස් පීඑල්සී සහ SLECIC දරන පොදු දැක්මද මෙම හවුල්කාරීත්වයෙන් පිළිබිඹු වේ.

ආරක්ෂිත සහ ක්‍රමවත් මූල්‍ය විසඳුම් සමග බලගැන්වීමෙන් ශ්‍රී ලාංකික පාරිභෝගිකයන් වෙත විශ්වාසයෙන් සහ ගෞරවනීයත්වයක් සහිතව විදේශ රැකියා සඳහා තිරසාර අවස්ථා නිර්මාණය කිරීම මෙම සහයෝගීතාවේ අරමුණයි. මේ සඳහා වූ ගිවිසුමකට අත්සන් තැබීමේ උත්සවය රාජගිරිය LOLC ෆිනෑන්ස් පීඑල්සී ප්‍රධාන කාර්යාලයේදී පසුගියදා උත්සවාකාරයෙන් පැවැත්විණ.

ශ්‍රී ලංකා අපනයන ණය රක්ෂණ සංස්ථාව (SLECIC) වෙනුවෙන් එහි සභාපති ආචාර්ය අරුණ ශාන්තාරච්චි විසින් අත්සන් කරන ලද එම ගිවිසුම එහිදී LOLC ෆිනෑන්ස් පීඑල්සී අධ්‍යක්‍ෂ/ ප්‍රධාන විධායක නිලධාරී ක්‍රිෂාන් තිලකරත්න මහතා වෙත නිල වශයෙන් භාරදෙන ලදී. 

ලංකා රේටිංන්ස් ආයතනයේ A+ ස්ථාවර ශ්‍රේණිගත කිරීමක් සහිත, ශ්‍රී ලංකාවේ විශාලතම, වඩාත් ජනාදරය දිනූ, වටිනාම බැංකු නොවන මූල්‍ය ආයතනය වන LOLC ෆිනෑන්ස් පීඑල්සීය.