ශ්‍රී ලංකාවේ සම්මානලාභී නැගී එන ව්‍යාපාරික කේන්ද්‍රය සහ ව්‍යවසායකත්ව පද්ධතියේ ප්‍රධාන බලවේගයක් වන Hatch ආයතනය, රටේ පළමු නවෝත්පාදන දිස්ත්‍රික්කය කොළඹ 01 හි නිර්මාණය කිරීමේ දැවැන්තම මුලපිරීම ඉදිරියට ගෙන යමින් සිටී. මෙම අදහස පිළිබඳව ජනතාව දැනුවත් කිරීම ප්‍රථම වරට 2025 මාර්තු මාසයේ පැවති Startup Nation 2025 වැඩසටහනේ දී සිදු කළ අතර, 2025 ඔක්තෝබර් 1 වන දින පැවති සමාප්ති උත්සවයේ දී ද එය නැවත ප්‍රකාශයට පත් කරන ලදී. මෙය Hatch නවෝත්පාදන දිස්ත්‍රික්කය ලංකාවේ ව්‍යවසායකත්වයේ සහ නවෝත්පාදනයේ අනාගතය හැඩගස්වා ගත හැකි ප්‍රධාන සන්ධිස්ථානයක් ලෙස ස්ථානගත කරයි.

2018 වසරේ ආරම්භ කළ දා සිට එකිනෙකා සමඟ සහයෝගයෙන් වැඩ කිරීමෙන් නවෝත්පාදන බිහිවන බවත්, ආර්ථික වර්ධනය සඳහා ව්‍යවසායකයන් ප්‍රධාන කාර්යභාරයක් ඉටු කරන බවත් Hatch හි විශ්වාසයයි. පසුගිය වසර හත තුළ, එය ආරම්භක ව්‍යාපාර සඳහා ප්‍රධාන කේන්ද්‍රස්ථානයක් බවට පත්ව ඇති අතර, ව්‍යාපාරික අවස්ථා, ජාත්‍යන්තර සම්බන්ධතා සහ ව්‍යවසායකයන්ට ඔවුන්ගේ අදහස් වර්ධනය කර සාර්ථක වීමට ආරක්ෂිත පරිසරයක් සපයයි. අද වන විට ලංකාවේ ක්‍රියාකාරී ව්‍යවසායකයන්ගෙන් බහුතරයකට Hatch හි විවිධ වැඩසටහන් සහ සේවා මගින් ධනාත්මක ප්‍රතිලාභ ලබා ගැනීමට හැකිව තිබේ.

ඉදිරියේ දී ආරම්භ වීමට නියමිත Hatch නවෝත්පාදන දිස්ත්‍රික්කය, Hatch හි ගමන් මගේ මීළඟ ප්‍රධාන පියවර වන අතර, එය 2027 වන විට ව්‍යවසායකයන්, කුඩා හා මධ්‍ය පරිමාණ ව්‍යාපාර, නිර්මාණකරුවන් සහ නවෝත්පාදන ප්‍රමුඛ ව්‍යාපාර ඇතුළු ව්‍යාපාර 3,000කට අධික සංඛ්‍යාවකට සහාය වීම අරමුණු කර ඇත. කොළඹ 01 හි පිහිටා ඇති මෙය, සහයෝගයෙන් වැඩ කළ හැකි කාර්යාල අවකාශ, නිෂ්පාදන මැදිරි, ආයතනික නවෝත්පාදන වැඩසටහන්, විවේකාගාර, රැස්වීම් කාමර මෙන්ම රාජ්‍ය හා පෞද්ගලික හවුල්කරුවන් සඳහා පහසුකම් රැසක් සපයනු ඇත. මෙවැනි අරමුණක් ඇතුව සාදන ලද පරිසරය මගින් ආරම්භක සහ වර්ධනය වන ව්‍යාපාරවලට වේගයෙන් වර්ධනය වීමට අවශ්‍ය යටිතල පහසුකම් සම්පත් සහ සහාය ලබා දෙනු ඇත. 

සහයෝගීතාව සහ නවෝත්පාදනය වටා ගොඩනගා ඇති නවෝත්පාදන දිස්ත්‍රික්කය, ආයතන, ආයෝජකයන්, ප්‍රතිපත්ති සම්පාදකයන්, රාජ්‍ය නොවන සංවිධාන සහ ජාත්‍යන්තර සංවිධාන සමග ආරම්භක ව්‍යාපාර සම්බන්ධ කිරීම සඳහා නිර්මාණය කර ඇත.