ජාතික මිල දර්ශකය අනුව උද්ධමන අනුපාතිකය ඔක්තෝම්බර් මාසයේ දී සියයට 2.7 කින් ඉහළ ගොස් තිබේ. එයට කලින් මාසයේ පැවැති සියයට 2.1 ක අනුපාතිකය අනුව සලකන පසු ජීවන වියදම තවත් ඉහළ ගොස් ඇති බව නිරීක්ෂණය කළ හැකිය. ආහාර මිල ගණන් ඉහළ යෑම කලින් මාසයට වඩා සියයට 4.1 ක් බව සඳහන්ය.

 උත්සව කාලසීමාව තුළ අත්‍යවශ්‍ය ආහාර මිල ගණන් තවත් ඉහළ යනු ඇතැයි විශ්වාස කළ හැකිය. මේ අතර විනිමය අනුපාතිකය ද වෙනස් තැනකට ගමන් කරන බව දැක්වේ. ඉකුත් සතිය අවසන් වන විට ඇමරිකානු ඩොලරයක විකිනුම් මිල රුපියල් 311.41 ක් වශයෙන් මහ බැංකුව නියම කර තිබුණි. රුපියලේ අගය අවප්‍රමාණය සමග උද්ධමනය හා පොලී අනුපාත තව දුරටත් ප්‍රශ්නකාරී විය හැකිය. ආයෝජන අංශ මෙම පසුබිම අධ්‍යයනය කරන අතර එයට අමතරව දේශපාලන පීඩනය ගැන ද තද අවධානයක පසුවන බව සඳහන් කළ යුතුව තිබේ. රුපියලේ අගය අවප්‍රමාණය විදේශ ආයෝජකයන්ගේ මිල දී ගැනීම් සඳහා රුකුලක් විය හැකිය. සංචාරක කටයුතුවල හා අපනයන අංශයේ ද පිබිදීමකට හේතුවේ. මෙකී ස්වභාවය සලකා ඉදිරි දිනවල කොටස් වෙළෙඳපොළ වර්ධනයක් කරා ගමන්කරනු ඇති බවට සලකුණු සනිටුහන් කරයි. 

මේ අතර තවමත් විදේශ ආයෝජන අංශ විකිණීම්වලට නැඹුරුය. දිනයේ ගනුදෙනුවල දී විදේශ මිල දී ගැනීම් රුපියල් මිලියන 126.9 ක් වන අතර විකිණීම් රුපියල් මිලියන 290.8 කි. පසුගිය සතියේ ගනුදෙනු කාලය තුළ පමණක් විදේශ විකිණීම් හෙයින් රුපියල් මිලියන 461 ක ශුද්ධ වටිනාකමක් රටින් බැහැර වී තිබේ. 

මෙදින ගනුදෙනු අවසානයේ සියලු කොටස් මිල දර්ශකය ඒකක 22,982.72 ක් තෙක් පහළ ගියේය. දින දොළහකට කලින් තිබුණ මට්ටම කරා ආපසු පැමිණ තිබේ. එය කලින් දිනයට සාපේක්ෂව දර්ශක 122.24 ක පිරිහීමකි. එස් ඇන්ඩී පී ශ්‍රී ලංකා දර්ශකය 6,364.61 ක් විය. පෙර දිනයට සාපේක්ෂව දර්ශක 17.51 ක පහළ වැටීමකි. දෛනික පිරිවැටුම රුපියල් බිලියන 3.8කි. ගනුදෙනු 30,302 ක් වාර්තා වී තිබේ. හුවමාරු වූ කොටස් ප්‍රමාණය මිලියන 146.6 ක් විය. සමාගම් 107 ක කොටස් මිල ඉහළ ගියේය. කොටස් මිල පහත වැටුණ සමාගම් ගණන 139 කි. මිල දී ගැනීමේ උනන්දුව සියයට 51.1 ක පැවැතිණි.

නිරීක්ෂක