නැගෙනහිර විශ්ව විද්‍යාලයේ ආර්ථික වශයෙන් දුර්වල සමාජ කොට්ඨාසවල දක්ෂ සිසු සිසුවියන් සඳහා ඉන්දීය ප්‍රදාන යටතේ ඉහළ නංවන ලද මූල්‍යාධාර වැඩසටහනක් ඉන්දීය මහ කොමසාරිස් සන්තෝෂ් ජා මහතා පසුගියදා ආරම්භ කළේය. 
මෙයට පෙර කලින් අධ්‍යයන වර්ෂය සඳහා ඉන්දීය ප්‍රදාන යටතේ ආර්ථික පසුබිම සහ අධ්‍යයන දක්ෂතා මත පදනම්ව විශ්ව විද්‍යාලයෙන් තෝරා ගත් සිසු සිසුවියන් 100ක් සඳහා මසකට රුපියල් 5000 බැගින් වන ශිෂ්‍යත්වයක් ක්‍රියාවට නංවා තිබිණ. 
මෙම ශිෂ්‍යත්ව වැඩසටහන සම්බන්ධයෙන් ඉතා ධනාත්මක ප්‍රතිචාර හිමි වූ අතර මෙම යෝජනාක්‍රමය තවදුරටත් ව්‍යාප්ත කරන ලෙස සහ ඉහළ නංවන ලෙස විශ්ව විද්‍යාල බලධාරීන්ගෙන්, සිසු සිසුවියන්ගෙන් සහ ඔවුන්ගේ පවුල්වලින් ඉල්ලීම් රැසක් ඉදිරිපත් විය. ශ්‍රී ලංකා සංචාරය අතරතුරදී අග්‍රාමාත්‍ය ශ්‍රී නරේන්ද්‍ර මෝදි මහතා නිවේදනය කළේ ඉන්දියාව නැගෙනහිර විශ්ව විද්‍යාලයේ සහ යාපනය විශ්ව විද්‍යාලයේ විද්‍යාර්ථයන් සඳහා වන ශිෂ්‍යත්ව යෝජනාක්‍රමය ඉහළ නංවන බවයි. 
ඒ අනුව, ඉහළ නංවන ලද ශිෂ්‍යත්ව යෝජනා ක්‍රමය යටතේ වර්තමාන අධ්‍යයන වර්ෂයේ සිට සෑම වසරකම පළමු වසරේ ඉගෙනුම ලබන ශිෂ්‍ය ශිෂ්‍යාවන් 100 දෙනකුට මසකට රුපියල් 7500 බැගින් ඔවුන්ගේ අධ්‍යයන පාඨමාලා අවසන් වන තෙක් ලබා දෙනු ඇත. ඒ අනුව මෙම වැඩසටහන ක්‍රියාත්මක කරන සිව් වැනි වසර වන විට විශ්ව විද්‍යාලයේ සිසු සිසුවියන් 400 දෙනකුට ශිෂ්‍යත්ව හිමි වනු ඇත.