• 2025 වර්ෂය වෙනුවෙන් නොවැම්බර් 17 වැනි දින වන විට රැස්කර ඇති මුදල රු.මි.2,002,241 ක්
• 2024 වර්ෂයේ සමස්ත ආදායමට සාපේක්ෂව රු.මි. 60,079 ක වැඩිවීමක්

දේශීය ආදායම් දෙපාර්තමේන්තුව ඉතිහාසයේ මෙතෙක් රැස් කරන ලද ඉහළම බදු ආදායම 2025 වර්ෂය වෙනුවෙන් නොවැම්බර් 17 වැනි දින වන විට රැස්කර ඇති බවත් එය රුපියල් මිලියන 2,002,241 ක් (රුපියල් බිලියන 2,002.241ක්) පමණ වන බවත් දේශීය ආදායම් දෙපාර්තමේන්තුව සඳහන් කරයි.
මෙම ආදායම 2024 වර්ෂයේ සමස්ත ආදායමට සාපේක්ෂව රුපියල් මිලියන 60,079 ක වැඩිවීමක් බවද දේශීය ආදායම් දෙපාර්තමේන්තුව පෙන්නා දෙයි.
2024 සමස්ත වර්ෂයේදී දේශීය ආදායම් දෙපාර්තමේන්තුව රැස් කරන ලද රුපියල් මිලියන 1,942,162 ක බදු ආදායම සමග සැසඳීමේ 2025 වසරේ නොවැම්බර් 17 වැනි දින වන විට බදු ආදායම රුපියල් මිලියන 2,002,241 ක් දක්වා වර්ධනය කර ගැනීමෙන් රාජ්‍ය මුල්‍ය තත්වය ශක්තිමත්ව පවත්වා ගැනීමට දේශීය ආදායම් දෙපාර්තමේන්තුව ප්‍රශංසනීය දායකත්වයක් සපයා ඇත.
පවත්නා බදු නීතියට අනුගත වෙමින් රට වෙනුවෙන් හා රටේ පොදු මහජනතාවගේ අභිවෘද්ධිය වෙනුවෙන් බදු ගෙවන ලද ගෞරවනීය බදු ගෙවන්නන්ටත් ඒ සඳහා විවිධාකාරයෙන් සහයෝගය ලබා දුන් රාජ්‍ය හා පෞද්ගලික ආයතනවල නිලධාරීන්ටත් දේශීය ආදායම් දෙපාර්තමේන්තුව සිය කෘතඥතාව පළ කර සිටියි.